విశ్వ కార్తికేయ కథానాయకుడిగా నటించిన చిత్రం 'అల్లంత దూరాన'. ఆయనకు జోడీగా ప్రముఖ నాయిక ఆమని మేనకోడలు హ్రితిక శ్రీనివాసన్‌ నటించింది. చలపతి పువ్వల దర్శకత్వం వహించారు.
ఆర్‌.ఆర్‌. క్రియేటివ్‌ కమర్షియల్‌ పతాకంపై శ్రీమతి కోమలి సమర్పణలో నిర్మాత ఎన్‌.చంద్రమోహనరెడ్డి తెలుగు, తమిళ భాషలలో నిర్మిస్తున్నారు. ఈ చిత్రంలోని 'కొక్కొరొకో...' అనే పల్లవితో సాగే పాటను నిర్మాత కె.ఎస్‌.రామారావు ఆవిష్కరించారు.
ఈ సందర్భంగా ఆయన మాట్లాడుతూ, 'ఇది పేరుకు చిన్న చిత్రంగా అనిపించినా నిర్మాత ఎక్కడా రాజీపడకుండా నిర్మించారు. ఒకప్పటి చిత్రాల కోవలో కథ, కథనాలకు అత్యంత ప్రాధాన్యమిస్తూ తీసినట్లుగా తెలిసింది. అందుకే ఎంతో అభిరుచి కలిగిన ఈ చిత్ర నిర్మాతను అభినందిస్తున్నాను. ఇలాంటి చిత్రాలు మరిన్ని రావాల్సిన అవసరం ఎంతైనా ఉంది' అని తెలిపారు. 'ఫీల్‌ గుడ్‌ లవ్‌ స్టోరీ ఇది. చాలా క్వాలిటీగా చిత్రాన్ని తీశాం. నిర్మాత సంపూర్ణ సహకారంతోనే ఓ మంచి చిత్రాన్ని తీయగలిగాం' అని దర్శకుడు చలపతి పువ్వల అన్నారు.
నిర్మాత ఎన్‌. చంద్రమోహనరెడ్డి మాట్లాడుతూ, 'కె.ఎస్‌.రామారావు గారి క్రియేటివ్‌ కమర్షియల్‌ సంస్థ అంటే నాకు ఎంతో ఇష్టం. ఆ పేరు వచ్చేలా మా బ్యానర్‌కు కూడా పేరు పెట్టుకున్నాం. ప్రస్తుతం పోస్ట్‌ ప్రొడక్షన్‌ కార్యక్రమాలు జరుపుతున్నాం. హైదరాబాద్‌తో పాటు కార్వేటినగరం, పుత్తూరు, తిరుపతి, ఆర్‌.కె.వి.పేట, కేరళ, చెన్నై, పాండిచ్చేరి తదితర లొకేషన్లలో షూటింగ్‌ చేశాం. తెలుగుతో పాటు పలువురు ప్రముఖ తమిళ నటీనటులు కూడా ఇందులో నటించారు. సినిమా చాలా బాగా వస్తోంది. త్వరలోనే మా చిత్రాన్ని విడుదల చేస్తాం' అని చెప్పారు.
