యువ కథాననాయకుడు కిరణ్‌ అబ్బవరం నటించిన తాజా సినిమా 'సెబాస్టియన్‌ పిసి 524'. కోమలీ ప్రసాద్‌, నువేక్ష (నమ్రతా దరేకర్‌) హీరోయిన్లు. జ్యోవిత సినిమాస్‌ పతాకంపై ఎలైట్‌ ఎంటర్టైన్మెంట్ సమర్పణలో సిద్ధారెడ్డి బి, జయచంద్ర రెడ్డి, రాజు, ప్రమోద్‌ నిర్మించారు. బాలాజీ సయ్యపురెడ్డి దర్శకుడు. ఈ సినిమాను ప్రపంచవ్యాప్తంగా ప్రైమ్‌ షో ఎంటర్టైన్మెంట్ సంస్థ మార్చి 4న విడుదల చేస్తోంది.
ఈ నేపథ్యంలో గురువారం ఈ చిత్రంలోని 'కంటిలోన చీకటిని, గుండెలోన దాచుకుని... వేదనలో వేడుకలా వెలుగు సెబా...రాజాధి రాజా' అంటూ సాగే పాటను మేకర్స్‌ రిలీజ్‌ చేశారు.
ఈ సందర్భంగా నిర్మాతలు మాట్లాడుతూ, 'మా హీరో కిరణ్‌ అబ్బవరం ఈ సినిమాతో కచ్చితంగా హ్యాట్రిక్‌ హిట్‌ అందుకుంటారు. ఇప్పటికే విడుదలైన ప్రచార చిత్రాలు ప్రేక్షకుల్ని ఆకట్టుకున్నాయి. 'హేలీ...' పాటకు మంచి స్పందన లభించింది. ఇప్పుడీ 'సెబా...' పాట సైతం విడుదలైన వెంటనే సోషల్‌ మీడియాలో మంచి స్పందన రాబట్టుకుంది. జిబ్రాన్‌ సంగీతం దర్శకత్వంలో పాటలన్నీ అద్భుతంగా వచ్చాయి. రేచీకటి నేపథ్యంలో ఈ సినిమా తెరకెక్కింది. రేచీకటి ఉన్న హీరోకి పోలీస్‌ కానిస్టేబుల్‌ ఉద్యోగం వస్తుంది. రే చీకటితో అతడు నైట్‌ టైమ్‌ డ్యూటీ ఎలా చేశాడు?, రేచీకటి వల్ల ఎటువంటి ఇబ్బందులు ఎదురయ్యాయి? అనేది సినిమా కథాంశం. మార్చి 4న ప్రైమ్‌ షో ఎంటర్టైన్మెంట్ సంస్థ ప్రపంచవ్యాప్తంగా మా చిత్రాన్ని చాలా గ్రాండ్‌గా విడుదల చేస్తున్నారు' అని తెలిపారు.
శ్రీకాంత్‌ అయ్యంగార్‌, సూర్య, రోహిణీ రఘువరన్‌, ఆదర్ష్‌ బాలకష్ణ, జార్జ్‌, సూర్య, మహేష్‌ విట్టా, రవితేజ, రాజ్‌ విక్రమ్‌, లత, ఇషాన్‌, రాజేష్‌ తదితరులు ప్రధాన పాత్రలు పోషించిన ఈ చిత్రానికి ఫైట్స్‌: అంజి మాస్టర్‌, కూర్పు: విప్లవ్‌ న్యసదాం, కళ: కిరణ్‌ మామిడి, ఛాయాగ్రహణం: రాజ్‌ కె. నల్లి, ఎగ్జిక్యూటివ్‌ నిర్మాత: కె.ఎల్‌. మదన్‌, సంగీతం: జిబ్రాన్‌, నిర్మాతలు: సిద్ధారెడ్డి బి, జయచంద్ర రెడ్డి, ప్రమోద్‌, రాజు, కథ - దర్శకత్వం: బాలాజీ సయ్యపురెడ్డి.
