నాగలక్ష్మి ప్రొడక్షన్‌ పతాకం పై రూపొందుతున్న చిత్రం 'దేశం కోసం'. స్వాతంత్య్ర సమర పోరాటంలో అశువులు బాసిన అమరవీరులు భగత్‌ సింగ్‌, చంద్రశేఖర్‌ ఆజాద్‌ల జీవిత విశేషాల ఆధారంగా ఈ చిత్రాన్ని తెరకెక్కించారు.
'నాగమ నాయకుడు', 'రాఘవేంద్ర మహత్యం' వంటి పలు చిత్రాలను నిర్మించడంతో పాటు, ప్రధాన పాత్రల్లో నటించిన రవీంద్ర ఈ చిత్రంలోనూ ఓ ప్రధాన పాత్ర పోషిస్తూ స్వీయ దర్శకత్వంలో దీన్ని నిర్మిస్తున్నారు. ఇందులో చంద్రశేఖర్‌ ఆజాద్‌గా నూతన నటుడు రాఘవేంద్ర నటించగా, భగత్‌ సింగ్‌గా రవీంద్ర నటించారు. 'మంచి దేశభక్తి చిత్రాన్ని ప్రేక్షకులకు అందించాలన్న సదాశయంతో ఈ చిత్రాన్ని ఎంతో అభిరుచితో రూపొందించాం. బుధవారం భగత్‌ సింగ్‌ వర్ధంతి సందర్భంగా తొలిసారి ఈ చిత్ర విశేషాలను అందరితో షేర్‌ చేస్తున్నాం. హైదరాబాద్ పరిసర ప్రాంతాలలో షూటింగ్‌ జరిపాం. ఇటీవలే షూటింగ్‌ మొత్తం పూర్తయింది. నిర్మాణానంతర పనులు త్వరలోనే మొదలు కానున్నాయి. అన్ని వర్గాల ప్రేక్షకుల్లో దేశభక్తిని పెంపొందించే చిత్రమిది' అని నటుడు, దర్శక, నిర్మాత రవీంద్ర తెలిపారు. సుధ, జీవ, ప్రసాద్‌ బాబు, సూర్య, అశోక్‌ కుమార్‌, మనోహర్‌, వెంకటేశ్వరరావు, మెహర్‌, సుహరిన్‌ తదితరులు ఇతర ముఖ్య పాత్రల్లో నటించిన ఈ చిత్రానికి ప్రమోద్‌ శర్మ, సూర్యప్రకాష్‌, ఆనంద్‌, రామారావు, రామకష్ణ, చంద్రమోహన్‌ తదితరులు సాంకేతిక బృందం.
