భారతదేశంలో మొదటిసారి సూపర్‌గర్ల్‌ కథాంశంతో విజువల్‌ వండర్‌గా రాబోతున్న చిత్రం 'ఇంద్రాణి'. వినూత్న తరహాలో భారీ వీఎఫ్‌ఎక్స్‌తో తెరకెక్కుతున్న ఈ చిత్రం ద్వారా స్టీఫెన్‌ దర్శకుడిగా పరిచయమవుతున్నారు. యానియా భరద్వాజ్‌, కబీర్‌ సింగ్‌, ఫ్రణిత జిజిన ప్రధాన పాత్రల్లో నటిస్తున్నారు. ఈ సినిమా ఆదివారం హైదరాబాద్‌లో పూజా కార్యక్రమాలతో ఘనంగా ప్రారంభమైంది. ముహూర్తపు సన్నివేశానికి నరేష్‌ విజయకష్ణ క్లాప్‌ కొట్టగా, నిర్మాత బెక్కం వేణుగోపాల్‌ కెమెరా స్విచాన్‌ చేశారు. ఈ సందర్భంగా ఏర్పాటు చేసిన విలేఖరుల సమావేశంలో ఈ చిత్ర మోషన్‌ పోస్టర్‌ను తుంబాడ్‌ (హింది) దర్శకుడు రాహి అనిల్‌ బార్వే విడుదల చేశారు.
యానియా భరద్వాజ్‌ మాట్లాడుతూ, 'ఇలాంటి సినిమాలో నటిస్తున్నందుకు చాలా గర్వంగా ఉంది. నేను పాత్రని సెలెక్ట్‌ చేసుకోలేదు. 'ఇంద్రాణి' పాత్రే నన్ను సెలెక్ట్‌ చేసుకుంది. ఈ సినిమాలో నాకు మంచి రోల్‌ ఇచ్చిన దర్శక, నిర్మాతలకు ధన్యవాదాలు. తప్పకుండా ఈ సినిమా మీ అందరికీ నచ్చుతుంది' అని అన్నారు.
చిత్ర దర్శకుడు స్టీఫెన్‌ మాట్లాడుతూ, 'చిన్నపిల్లలందరికి ఇండియాలో సూపర్‌ హీరో లేరు. ఈ సినిమా రిలీజ్‌ తరువాత 'ఇంద్రాణి' గురించి దేశం మొత్తం మాట్లాడుకుంటారు. ఇది ఫుల్‌ ఎంటర్టైన్మెంట్‌తో వస్తున్న పక్కా మాస్‌ మార్వెల్‌ సినిమా. అన్ని రకాల కమర్షియల్‌ అంశాలు ఉంటాయి. ప్రపంచం మొత్తం 'ఇంద్రాణి' వైపు చూసేలా క్రియేటివ్‌ వరల్డ్‌లా ఈ సినిమాను భారీ బడ్జెట్‌, హై టెక్నికల్‌ వ్యాల్యూస్‌తో రూపొందింస్తున్నాం. 'ఇంద్రాణి' పాత్రలో డిఫరెంట్‌ షేడ్స్‌ ఉంటాయి. వాటన్నింటికి యానియా భరద్వాజ్‌ ఫ్రొఫైల్‌ సరిగ్గా సరిపోవడంతో లీడ్‌ క్యారెక్టర్‌కు ఆమెను సెలక్ట్‌ చేసుకోవడం జరిగింది. ఈ సినిమా కోసం మార్షల్‌ ఆర్ట్స్‌లో శిక్షణ కూడా తీసుకుంది. యానియా యాక్షన్‌ ఎపిసోడ్స్‌ ప్రేక్షకుల్ని తప్పకుండా అలరిస్తాయి' అని చెప్పారు.
'రెండున్నర సంవత్సరాల పాటు శ్రమించి స్టీఫెన్‌ చాలా అద్భుతమైన కథను రెడీ చేశారు. ఈ సినిమాలో యాక్షన్‌ ఎపిసోడ్స్‌ అన్ని వర్గాల ప్రేక్షకులను ఆకట్టుకునేలా ఉంటాయి. సాయి కార్తీక్‌ మ్యూజిక్ సినిమాకు హైలైట్‌ అవుతుంది' అని ఎగ్జిక్యూటివ్‌ ప్రొడ్యూసర్‌ స్టాన్లీ సుమన్‌ బాబు తెలిపారు.
యానియా భరద్వాజ్‌, కబీర్‌ సింగ్‌, ఫ్రణిత జిజిన, గరీమా కౌశల్‌, షతఫ్‌ అహ్మద్‌ తదితరులు నటిస్తున్న ఈ చిత్రానికి డిఓపి: చరణ్‌ మాధవ నేని, ఎడిటర్‌: చోటా కె ప్రసాద్‌, మ్యూజిక్: సాయి కార్తీక్‌, ఆర్ట్‌ డైరెక్టర్‌: రవి కుమార్‌ గుర్రం, యాక్షన్‌ డైరెక్టర్‌: ప్రేమ్‌ సన్‌, క్యాస్టింగ్‌ డైరెక్టర్‌: అమిత్‌ అవినాష్‌ శర్మ.
