యష్‌ ఎంటర్‌టైన్‌మెంట్స్‌ పతాకంపై యష్‌రాజ్‌ సమర్పణలో తెరకెక్కుతున్న చిత్రం 'నీకు... నాకు... రాసుంటే...'. 'గణా'' చిత్ర డైరెక్టర్‌ కె.ఎస్‌.వర్మ దర్శకత్వం వహిస్తున్నారు. ఈశ్వర్‌, సాయివిక్రాంత్‌, రిషి, సూర్య ప్రధాన హీరోలుగా నటిస్తున్నారు. స్రవంతి పలగని, అభిషేక్‌ ఆవల సంయుక్తంగా నిర్మిస్తున్న ఈ సినిమా సాంగ్‌ రికార్డింగ్‌, బ్యానర్‌ లాంచింగ్‌ ఫిల్మ్‌చాంబర్‌లో శనివారం పూజా కార్యక్రమాలతో మొదలైంది.
ఈ సందర్భంగా ప్రముఖ గాయని సునీత మాట్లాడుతూ, 'తెలుగులో యశ్‌రాజ్‌ పేరుతో బ్యానర్‌ స్థాపించడంతోనే సగం విజయం సాధించారు నిర్మాతలు. గిన్నిస్‌ వరల్డ్‌ రికార్డ్‌ కోసం దర్శకులు వర్మ గారే 24 క్రాఫ్ట్స్‌ చేస్తున్నారు. ఈ ప్రయోగం ఒక మంచి ప్రయోగంగా మిగిలి పోవాలి. నేను లైవ్‌లో ఓ సినిమాకి పాట పాడటం ఇదే తొలిసారి. ఇది కూడా ఓ రికార్డ్‌ అనుకుంటా. నాకు ఈ ప్రయోగాత్మక చిత్రంలో పాడే అవకాశం ఇచ్చిన దర్శక, నిర్మాతలకు ధన్యవాదాలు' అని అన్నారు.
'తెలుగు, తమిళ, కన్నడ, మలయాళ, హిందీ భాషల్లో నిర్మిస్తున్న ఈ సినిమాలో అన్ని భాషలకు చెందిన నటీనటులు పనిచేస్తున్నారు. ప్రపంచ రికార్డు కోసం 24 క్రాఫ్ట్స్‌ను నేనే నిర్వహిస్తున్నాను. దీన్ని లైవ్‌ రికార్డు కూడా చేస్తాం. మా కష్టానికి తగ్గట్టుగా ప్రేక్షకులు కూడా ఆదరిస్తారని నమ్ముతున్నాను. మా సినిమాలో జాతీయ అవార్డు పొందిన ఓ ప్రముఖ హీరోయిన్‌ ముఖ్యమైన పాత్రలో నటించనున్నారు' అని దర్శకుడు కె.ఎస్‌.వర్మ తెలిపారు.
నిర్మాతలు స్రవంతి పలగని, అభిషేక్‌ ఆవల మాట్లాడుతూ,'భారత దేశం గర్వించే సినిమాలు చేసిన యశ్‌రాజ్‌ ఫిలింస్‌ని దష్టిలో పెట్టుకుని మా బ్యానర్‌కు ఈ పేరు పెట్టాం. యష్‌ రాజ్‌ అనేది మా అబ్బాయి పేరు కూడా కావడం మాకు లక్కీ. మా దర్శకుడు వర్మ గారు చెప్పిన లైన్‌ నచ్చి ఈ సినిమా సెట్స్‌కు మీదకు తీసుకెళ్తున్నాం. స్టోరీ బలంగా ఉందన్న నమ్మకంతో కొత్త వారితో చేస్తున్నాం. అలాగే టాలెంటెడ్‌ టెక్నీషియన్స్‌ను ఎంచుకున్నాం. ఈ సినిమాకి సంబంధించి మే నెలలో రెగ్యులర్‌ షూటింగ్‌ ప్రారంభించి, హైదరాబాద్, అరకు, వైజాగ్‌, మంగళూరు, ఊటీ, చెన్నై తదితర లొకేషన్స్‌లో చిత్రీకరణ జరుపుతాం. ఈ ఏడాది 3 సినిమాలు చేస్తాం' అని చెప్పారు. 'మాకు ఈ అవకాశం ఇచ్చిన దర్శక, నిర్మాతలకు థ్యాంక్స్‌. గత 6 నెలలుగా యూనిట్‌తో ట్రావెల్ చేస్తున్నాం. మా డెరైక్టర్‌ గారు మల్టీటాలెంటెడ్‌ అవడం వల్ల మేము కొత్త అనే ఫీలింగ్‌ కలగడం లేదు. ఈ సినిమాతో మాకు మంచి కెరీర్‌ దొరుకుతుందని ఆశిస్తున్నాం' అని హీరోలు ఈశ్వర్‌, సాయివిక్రాంత్‌, రిషి, సూర్య అన్నారు.
