రాజశేఖర్‌ హీరోగా నటించిన తాజా సినిమా 'శేఖర్‌'. ఇందులో ఆయన పెద్ద కుమార్తె శివానీ రాజశేఖర్‌ కీలక పాత్ర పోషించారు. సినిమాలోనూ రాజశేఖర్‌ కుమార్తెగానే శివాని నటించడం ఓ విశేషమైతే, వీళ్ళిద్దరూ కలిసి వెండితెరపై తొలిసారి కనిపించడం మరో విశేషం.
జీవిత రాజశేఖర్‌ దర్శకత్వంలో తెరకెక్కుతున్న ఈ సినిమా అన్ని కార్యక్రమాలను పూర్తి చేసుకుని విడుదలకు సిద్ధంగా ఉంది. హీరోగా రాజశేఖర్‌ నటించిన 91వ సినిమా 'శేఖర్‌'. వంకాయలపాటి మురళీకష్ణ సమర్పణలో, పెగాసస్‌ సినీ కార్ప్‌, టారస్‌ సినీ కార్ప్‌, సుధాకర్‌ ఇంపెక్స్‌ ఐపీఎల్‌, త్రిపురా క్రియేషన్స్‌ పతాకాలపై బీరం సుధాకర్‌ రెడ్డి, శివానీ రాజశేఖర్‌, శివాత్మికా రాజశేఖర్‌, వెంకట శ్రీనివాస్‌ బొగ్గరం ఈ చిత్రాన్ని నిర్మించారు. దర్శకురాలు జీవితా రాజశేఖర్‌ మాట్లాడుతూ, 'రాజశేఖర్‌, శివాని మధ్య సన్నివేశాలు సినిమాకు ప్రత్యేక ఆకర్షణగా నిలుస్తాయి. నిజ జీవితంలో ఎలా ఉంటారో... సినిమాలో కూడా అలాగే ఉన్నారు. వారిద్దరూ చాలా సహజంగా నటించారు. ఇప్పటికే విడుదల చేసిన ప్రచార చిత్రాలు, ఫస్ట్‌ గ్లింప్స్‌, 'లవ్‌ గంట మోగిందంటే..' పాటకు అద్భుత స్పందన లభించింది. సినిమా కూడా అదే స్థాయిలో ఆకట్టుకుంటుందనే నమ్మకం ఉంది. ప్రస్తుతం పోస్ట్‌ ప్రొడక్షన్‌ పనులు శరవేగంగా జరుగుతున్నాయి. మే 20న మా చిత్రాన్ని భారీ స్థాయిలో రిలీజ్‌ చేసేందుకు నిర్మాతలు సన్నాహాలు చేస్తున్నారు' అని తెలిపారు.
ఆత్మీయ రజన్‌, జార్జ్‌ రెడ్డి ఫేమ్‌ ముస్కాన్‌, అభినవ్‌ గోమఠం, కన్నడ కిషోర్‌, సమీర్‌, భరణి శంకర్‌ , రవి వర్మ, శ్రవణ్‌ రాఘవేంద్ర తదితరులు నటించారు.
