మహేష్‌ బాబు, పరశురామ్‌ కాంబినేషన్‌లో రూపొందుతున్న ప్రతిష్టాత్మక చిత్రం 'సర్కారు వారి పాట'. ఈ సినిమా షూటింగ్‌ మొత్తం పూర్తయ్యింది. చిత్ర పోస్ట్‌ ప్రొడక్షన్‌ పనులు కూడా శరవేగంగా జరుగుతున్నాయి. శనివారం చిత్ర యూనిట్‌ ఈ సినిమా నుంచి మూడవ పాటగా టైటిల్‌ సాంగ్‌ను విడుదల చేసింది. గత రెండు పాటలు మాదిరిగానే ఈ పాట కూడా విడుదలైన క్షణాల్లోనే వైరల్‌ అయ్యింది.
ఈ సందర్భంగా మేకర్స్‌ మాట్లాడుతూ, 'సంగీత దర్శకుడు తమన్‌ తనదైన శైలిలో ఇచ్చిన ఫాస్ట్‌ బీట్‌తో టైటిల్‌ సాంగ్‌ అదిరిపోయింది. పాట మొదలైనప్పటి నుంచి చివరి వరకూ ఫుల్‌ ఎనర్జీటిక్‌గా, ఎంగేజింగ్‌గా ఉంది. సినిమాలో ఇది మహేశ్‌బాబు పాత్రని వర్ణించే పాట. అనంత్‌ శ్రీరామ్‌ రాసిన 'ఆయుధాలు లేని వేట, రివర్స్‌ లేని బాట' అనే మాటలు ఈ సినిమాలో మహేష్‌ బాబు పాత్ర ఎలా ఉండబోతుందో చెప్పకనే చెప్పాయి. హారిక నారాయణ్‌ హై పిచ్‌లో పాడిన విధానం టైటిల్‌ సాంగ్‌కి సరిగ్గా సరిపోయింది. ఈ పాటలో మహేష్‌ బాబు పూర్తిగా యాక్షన్‌ లుక్స్‌లో కనిపించి అలరిస్తున్నారు. మొదటి రెండు పాటల్లాగే ఈ టైటిల్‌ ట్రాక్‌ కూడా చార్ట్‌ బస్టర్‌ లిస్టులో చేరింది. కీర్తి సురేష్‌ కథానాయికగా నటిస్తున్న ఈ ప్రతిష్టాత్మక చిత్రాన్ని మైత్రీ మూవీ మేకర్స్‌, జీఏంబీ ఎంటర్‌టైన్‌మెంట్‌, 14 రీల్స్‌ ప్లస్ బ్యానర్‌లపై నవీన్‌ యెర్నేని, వై. రవిశంకర్‌, రామ్‌ ఆచంట, గోపీచంద్‌ ఆచంట సంయుక్తంగా నిర్మిస్తున్నారు. ఈ చిత్రాన్ని మే 12న ప్రపంచవ్యాప్తంగా గ్రాండ్‌గా విడుదల చేయబోతున్నారు' అని అన్నారు.
వెన్నెల కిషోర్‌, సుబ్బరాజు తదితరులు కీలక పాత్రల్లో నటిస్తున్న ఈ చిత్రానికి
రచన, దర్శకత్వం: పరశురాం పెట్ల, సినిమాటోగ్రఫీ: ఆర్‌ మధి, ఎడిటర్‌: మార్తాండ్‌ కె వెంకటేష్‌, ఆర్ట్‌ డైరెక్టర్‌: ఏఎస్‌ ప్రకాష్‌, ఫైట్స్‌: రామ్‌ - లక్ష్మణ్‌,
వీఎఫ్‌ఎక్స్‌ సూపర్‌వైజర్‌ - యుగంధర్‌.
