సుమంత్‌ కథానాయకుడిగా నటిస్తున్న తాజా చిత్రం 'అహం రీబూట్‌'. ఈ చిత్రాన్ని వాయుపుత్ర ఎంటర్‌టైన్‌మెంట్స్‌, ఎస్‌ ఒరిజినల్స్‌ సంయుక్త నిర్మాణంలో రఘువీర్‌ గోరిపర్తి, సజన్‌ యరబోలు నిర్మిస్తున్నారు. ప్రశాంత్‌ సాగర్‌ అట్లూరి దర్శకత్వం వహిస్తున్నారు. ప్రస్తుతం పోస్ట్‌ ప్రొడక్షన్‌ పనులు శరవేగంగా జరుగుతున్నాయి. ఈ నేపథ్యంలో ఈ చిత్ర ఫస్ట్‌ లుక్‌ని ప్రముఖ రచయిత విజయంద్ర ప్రసాద్‌ ఆవిష్కరించారు. ఈ పోస్టర్‌లో సుమంత్‌ లుక్‌ని సరికొత్తగా డిజైన్‌ చేయటం ఓ విశేషమైతే, ఫేస్‌ మీద ఒకవైపు హెల్ప్‌ మీ అనే అక్షరాలు రోల్‌ అవడం, హెడ్‌ ఫోన్స్‌ పెట్టుకున్న సుమంత్‌...సాయం చేయమని కోరే వాళ్లతో మాట్లాడుతున్నట్లు, సుమంత్‌ పాత్రకు తగ్గట్లుగా కాన్సెప్ట్‌ను వివరించేలా ఈ పోస్టర్‌ ఉండటం మరో విశేషం.
ఈ సందర్బంగా రచయిత విజయేంద్ర ప్రసాద్‌ మాట్లాడుతూ, 'ఈ సినిమా కాన్సెప్ట్‌ వినగానే చాలా ఎగ్జైట్‌ అయ్యాను. చాలా థ్రిల్లింగ్‌గా అనిపించింది. ఇలాంటి కథలకు ఇప్పుడు డిమాండ్‌ మరింత పెరిగింది. సైకలాజికల్‌ థ్రిల్లర్‌గా రూపొందుతున్న ఈ సినిమాలో నటిస్తున్న సుమంత్‌కి అభినందనలు. నిర్మాతలు రఘువీర్‌, సజన్‌ యరబోలు, దర్శకుడు ప్రశాంత్‌ సాగర్‌, ఇతర టెక్నీషన్స్‌కి ఆల్‌ ద బెస్ట్‌' అని అన్నారు.
'ఈ సినిమాతో ప్రేక్షకులకు కొత్త ఎక్స్‌పీరియన్స్‌ను అందించబోతున్నాం. అనుకోని సంఘటలను, మనిషిలోని కొత్త కోణాలను, శక్తులకు బయటకు తెస్తాయి. అవి ప్రేక్షకులకు చాలా థ్రిల్లింగ్‌గా అనిపిస్తాయి. ఇందులో సుమంత్‌ నటన చాలా హైలెట్‌గా ఉంటుంది' అని దర్శకుడు ప్రశాంత్‌ సాగర్‌ అట్లూరి చెప్పారు. నిర్మాత రఘువీర్‌ గోరిపర్తి మాట్లాడుతూ, 'మా సినిమా ఫస్ట్‌ లుక్‌, కాన్సెప్ట్‌ విజయేంద్ర ప్రసాద్‌గారికి ఆసక్తిగా అనిపించడం చాలా సంతోషంగా ఉంది. జూన్‌ మొదటివారంలో రిలీజ్‌ కిప్లాన్‌ చేస్తున్నాం. ఈ సినిమా మా బ్యానర్‌కి మంచి ఇమేజ్‌ తెస్తుందని నమ్ముతున్నాం' అని చెప్పారు.
ఈ చిత్రానికి సంగీతం : శ్రీరామ్‌ మద్దూరి, సినిమాటోగ్రఫీ : వరుణ్‌ అంకర్ల, స్క్రిప్ట్‌ సూపర్‌ విజన్‌ : సుమ కార్తికేయ, ప్రొడక్షన్‌ డిజైన్‌ : ఏఆర్‌ వంశీ, సౌండ్‌ : నాగార్జున తాళ్లపల్లి, రచన దర్శకత్వం : ప్రశాంత్‌ సాగర్‌ అట్లూరి.
