విజయ్ శంకర్‌, 'బిగ్‌బాస్‌' ఫేమ్‌ అషురెడ్డి హీరో, హీరోయిన్లుగా నటిస్తున్న చిత్రం 'ఫోకస్‌'. సుహాసిని మణిరత్నం, భానుచందర్‌ కీలక పాత్రల్లో నటిస్తున్న ఈ చిత్రానికి జి.సూర్యతేజ దర్శకుడు. మర్డర్‌ మిస్టరీ బ్యాక్‌డ్రాప్‌లో ఆద్యంతం ఉత్కంఠభరితమైన కథ, కథనాలతో న్యూ ఏజ్‌ సస్పెన్స్‌ థ్రిల్లర్‌గా ఈ చిత్రం తెరకెక్కింది.
ఇప్పటికే విడుదలైన పోస్టర్స్‌కి మంచి రెస్పాన్స్‌ రాగా ఇటీవల విడుదలైన టీజర్‌ ఐదు లక్షలకు పైగా వ్యూస్‌ సాధించి సోషల్‌ మీడియాలో విశేష ఆదరణ సొంతం చేసుకుంది. ఈ చిత్రంలో అషురెడ్డి మొదటిసారిగా పవర్‌ఫుల్‌ పోలీస్‌ ఆఫీసర్‌గా కనిపించనుంది. లేటెస్ట్‌గా అషురెడ్డి లుక్‌ను ఐపీఎస్‌ బి.సుమతి (డీఐజీ, మహిళా భద్రతా విభాగం) విడుదల చేసి, చిత్ర యూనిట్‌కు శుభాకాంక్షలు తెలిపారు.
ఈ సందర్భంగా దర్శకుడు జి.సూర్యతేజ మాట్లాడుతూ, 'ఈ సినిమా షూటింగ్‌తోపాటు పోస్ట్‌ ప్రొడక్షన్‌ వర్క్‌ కూడా పూర్తయ్యింది. అవుట్‌పుట్‌ చాలా బాగా రావడంతో మా యూనిట్‌ అంతా చాలా సంతోషంగా ఉన్నాం. అతి త్వరలో ఒక స్టార్‌ హీరోతో ట్రైలర్‌ని లాంచ్‌ చేయబోతున్నాం. త్వరలోనే రిలీజ్‌ డేట్‌ని ప్రకటిస్తాం' అని అన్నారు. స్కైరా క్రియేషన్స్‌ సమర్పణలో రిలాక్స్‌ మూవీ మేకర్స్‌ ఈ చిత్రాన్ని నిర్మిస్తోంది. జీవా, షియాజీ షిండే, భరత్‌ రెడ్డి, రఘు బాబు, సూర్య భగవాన్‌ తదితరులు నటిస్తున్న ఈ సినిమాకి ఎడిటర్‌: సత్య.జి, డీఓపీ: జె. ప్రభాకర్‌ రెడ్డి, సంగీతం: వినోద్‌ యజమాన్య, లిరికిస్ట్‌: కాసర్ల శ్యామ్‌.
