శ్రీ విష్ణు, క్యాథరిన్‌ థ్రెసా జంటగా నటించిన చిత్రం 'భళా తందనాన'. వారాహి చలనచిత్రం పతాకంపై సాయి కొర్రపాటి సమర్పణలో రజనీ కొర్రపాటి ఈ చిత్రాన్ని నిర్మించారు. చైతన్య దంతులూరి దర్శకుడు. ఈనెల 6న ఈ సినిమా విడుదలకానుంది. ఈ సందర్భంగా చిత్ర ట్రైలర్‌ ఆవిష్కరణ ఆదివారం విశాఖపట్నంలో ఆహ్లాదకర వాతావరణంలో జరిగింది. సిరిపురంలో జరిగిన ఈ వేడుకలో వినూత్నంగా ప్రేక్షకులు 'ట్రైలర్‌ రిలీజ్‌' అనడంతో ట్రైలర్‌ ఆవిష్కరణ జరిగింది. ఈ సందర్భంగా దర్శకుడు చైతన్య దంతులూరి మాట్లాడుతూ, 'ఈనెల 6న సినిమా విడుదలవుతుంది. అప్పటికే కాలేజీలకు హాలీడేస్‌ వస్తాయి. ఈ సినిమా చూడ్డానికి ప్లాన్‌ చేసుకోండి. ఈ సినిమా మీకు తీపి గుర్తును ఇస్తుంది. శ్రీవిష్ణు బ్యూటిఫుల్‌ యాక్టర్‌. సర్‌ప్రైజ్‌ కూడా ఇస్తాడు. సంగీత దర్శకుడు మణిశర్మ బ్యాక్‌గ్రౌండ్‌ మ్యూజిక్ అద్భుతంగా ఇచ్చారు. శ్రీవిష్ణు నటన, మణిశర్మ సంగీతం పోటీపడినట్లుగా ఉంటాయి. క్యాథరిన్‌ ఇంతకుముందు చేసిన పాత్రలకు పూర్తి భిన్నమైన పాత్ర చేసింది. నిర్మాత సాయిగారి వల్లే సినిమా బాగా వచ్చింది' అని తెలిపారు.
'ఈ సినిమా ఈ స్థాయికి రావడానికి కారణం సాయి కొర్రపాటిగారే. ఆయన డేరింగ్‌ నిర్మాత. వారాహి సంస్థలో పనిచేయడం సంతోషంగా ఉంది. క్వాలిటీపరంగా అన్నీ సమకూర్చి ప్రోత్సహించారు. దర్శకుడు చైతన్య, నేను 14 ఏళ్ళుగా స్నేహితులం. మొదటి సారి ఆయన సినిమాలో ఒక డైలాగ్‌ చెప్పాను. ఇప్పుడు హీరోగా ఆయన దర్శకత్వంలో చేశాను. ఇదే సిరిపురం థియేటర్‌లో సినిమాలు చూసేవాడిని. ఇక్కడివారు జెన్యూన్‌ రిపోర్ట్‌ ఇస్తారు. ఈ సినిమాలో క్యాథరిన్‌ బాగా నటించింది. ఆమె కెరీర్‌లోనే బెస్ట్‌ సినిమా అవుతుంది. ఇక 'కేజీఎఫ్‌' గరుడ రామ్‌గారు టాప్‌ విలన్‌గా మారారు. 'కేజీఎఫ్‌' తర్వాత ఆయనకు మంచి పేరు తెచ్చే సినిమా అవుతుంది. మణిశర్మగారి సంగీతం చాలా బాగుంది. రీరికార్డింగ్‌ అద్భుతంగా ఇచ్చారు. ఎడిటర్‌ మార్తాండ్‌ కె.వెంకటేష్‌, కెమెరామెన్‌ సురేష్‌ పనితనం కనువిందు కలిగిస్తుంది. ఈనెల 6న సినిమాను థియేటర్‌కు వచ్చి చూడండి. మీరు పెట్టే టిక్కెట్‌కి రెండింతలు వినోదాన్ని అందిస్తాం. మీకు తప్పకుండా నచ్చుతుంది. ఈనెల 6న వస్తున్నాం. హిట్‌ కొడుతున్నాం' అని హీరో శ్రీవిష్ణు చెప్పారు.
