అద్భుతమైన నటనతో, విభిన్న సినిమాలతో తన కంటూ ఒక ప్రత్యేక స్థానాన్ని సంపాదించుకున్నారు నాయిక ఐశ్వర్య రాజేష్‌.
విలక్షణ పాత్రలలో ఆకట్టు కుంటున్న ఆమె తాజాగా 'డ్రైవర్‌ జమున' పేరుతో మరో డిఫరెంట్‌ మూవీతో ప్రేక్షకులని అలరించడానికి సిద్ధమౌతున్నారు. అవుట్‌ అండ్‌ అవుట్‌ రోడ్‌ మూవీగా తెరకెక్కుతున్న ఈ చిత్రానికి పా. కిన్స్లిన్‌ దర్శకత్వం వహిస్తుండగా, 18 రీల్స్‌పై ఎస్‌.పి.చౌదరి నిర్మిస్తున్నారు.
తాజాగా నిర్మాత దిల్‌ రాజు ఈ చిత్ర ఫస్ట్‌ లుక్‌ పోస్టర్‌ను విడుదల చేశారు. ఈ ఫస్ట్‌ లుక్‌ పోస్టర్‌లో ముఖం మీద చెమటలు, గాయం కారణంగా రక్తం మరకలతో ఫెరోషియస్‌గా కనిపిస్తున్న ఐశ్వర్య రాజేష్‌ లుక్‌ ఎంతో ఆసక్తికరంగా ఉంది.
లేడీ క్యాబ్‌ డ్రైవర్‌ జీవితంలో చోటు చేసుకున్న నాటకీయ సంఘటనల నేపధ్యంలో ఈ చిత్రాన్ని థ్రిల్లింగ్‌గా రూపొందిస్తున్నారు. ఐశ్వర్య రాజేష్‌ ఈ పాత్ర కోసం చాలా మంది లేడీ క్యాబ్‌ డ్రైవర్లని కలిసి, వారి బాడీ లాంగ్వేజ్‌కి తగ్గట్టుగా ఎంతో సహజంగా ఈ పాత్రని చేస్తున్నారు. సాధారణంగా రోడ్‌ మూవీస్‌ని బ్లూ మ్యాట్‌ టెక్నాలజీని ఉపయోగించి చిత్రీకరిస్తారు. ఐతే ఐశ్వర్య ప్రతి ఒక్క షాట్‌ను ఎటువంటి డూప్‌ లేకుండా నటించారు. ఈ చిత్రంలో తన పాత్ర వాస్తవానికి దగ్గరగా ఉండే విధంగా స్వయంగా రోడ్లపై కారుని డ్రైవ్‌ చేశారు. జిబ్రాన్‌ సంగీతం అందిస్తున్న ఈ చిత్రానికికి గోకుల్‌ బెనోరు సినిమాటోగ్రాఫర్‌గా, ఆర్‌. రామర్‌ ఎడిటర్‌గా పని చేస్తున్నారు. చిత్రీకరణ చివరి దశలో ఉన్న ఈ చిత్రాన్ని తెలుగు, తమిళం, కన్నడ, మలయాళ భాషల్లో ఏకకాలంలో విడుదల చేయనున్నారు.
'నేను ప్రతి సినిమాలో నా పాత్ర వైవిధ్యంగా ఉండాలని ప్రయత్నిస్తాను. ఈ సినిమాలోనూ నా క్యారెక్టర్‌ చాలా డిఫరెంట్‌గా ఉంటుంది. ఆద్యంతం ఆసక్తికరంగా సాగే రోడ్‌ జర్నీ మూవీ ఇది. ప్రజెంట్‌ ట్రెండ్‌కి అనుగుణంగా ఉండే ఈ సినిమా అందర్నీ కచ్చితంగా అలరిస్తుంది' అని నాయిక ఐశ్వర్య రాజేష్‌ తెలిపారు. ఆడుకాలం నరేన్‌, శ్రీ రంజని, 'స్టాండ్‌ అప్‌ కమెడియన్‌' అభిషేక్‌, పాండియన్‌, కవితా భారతి, పాండి, మణికందన్‌, రాజేష్‌ తదితరులు నటిస్తున్న ఈ చిత్రానికి దర్శకత్వం: పా. కిన్స్లిన్‌, నిర్మాత: ఎస్‌.పి. చౌదరి, సంగీతం: జిబ్రాన్‌.
