సందీప్‌ కిషన్‌ హీరోగా, రంజిత్‌ జయకొడి దర్శకత్వంలో మక్కల్‌ సెల్వన్‌ విజరు సేతుపతి ప్రత్యేక పాత్రలో తెరకెక్కుతున్న భారీ యాక్షన్‌ ఎంటర్‌టైనర్‌ 'మైఖేల్‌'.
పాన్‌ ఇండియా సినిమాగా రూపొందుతున్న ఈ చిత్ర ఫస్ట్‌లుక్‌ని హీరో సందీప్‌ కిషన్‌ పుట్టినరోజు సందర్భంగా శనివారం యూనిట్‌ విడుదల చేసింది. 'గాడ్‌ ఓన్లీ ఫర్గివ్స్‌' అనే క్యాప్షన్‌ని రివీల్‌ చేేసిన ఈ పోస్టర్‌లో సందీప్‌ కిషన్‌ మునుప్పెన్నడు లేని విధంగా ఫిజికల్‌ ట్రాన్స్ఫర్మేషన్‌తో ఆకట్టుకున్నారు. సిక్స్‌ ప్యాక్‌ బాడీతో ఫెరోషియస్‌గా కనిపిస్తున్నారు. ఆయుధాలతో వస్తున్న క్రూరమైన వ్యక్తులుపై అంతే క్రూరంగా సందీప్‌ కిషన్‌ గన్‌తో గురిపెట్టడం ఈ పోస్టర్‌లో గమనించవచ్చు. ఈ సినిమా భారీ యాక్షన్‌ ఎంటర్‌టైనర్‌గా ఉండబోతుందని పోస్టర్‌ చెప్పకనే చెబుతోంది. అగ్ర దర్శకుడు గౌతమ్‌ వాసుదేవ్‌ మీనన్‌ ఈ చిత్రంలో విలన్‌గా నటిస్తుండగా, సందీప్‌ కిషన్‌ సరసన దివ్యాంశ కౌశిక్‌ హీరోయిన్‌గా నటిస్తోంది. వరలక్ష్మి శరత్‌కుమార్‌, వరుణ్‌ సందేశ్‌ కీలక పాత్రల్లో కనిపించనున్నారు. శ్రీ వెంకటేశ్వర సినిమాస్‌ ఎల్‌ఎల్‌పి, కరణ్‌ సి ప్రొడక్షన్స్‌ ఎల్‌ఎల్‌పి సహా నిర్మాణంలో ఈ చిత్రాన్ని భారీ స్థాయిలో నిర్మిస్తున్నారు. ఈ చిత్రాన్ని నారాయణ్‌ దాస్‌ కె.నారంగ్‌ సమర్పణలో భరత్‌ చౌదరి, పుస్కూర్‌ రామ్మోహన్‌ రావు నిర్మిస్తున్నారు. తెలుగు, తమిళం, కన్నడ, మలయాళం, హిందీ భాషల్లో ఈ చిత్రం ఏక కాలంలో విడుదల కానుంది.