రానా దగ్గుబాటి, సాయిపల్లవి జంటగా వేణు ఊడుగుల దర్శకత్వంలో రూపొందుతున్న వైవిధ్యమైన చిత్రం 'విరాటపర్వం'. డి.సురేష్‌ బాబు సమర్పణలో ఎస్‌.ఎల్‌.వి. సినిమాస్‌ పతాకంపై సుధాకర్‌ చెరుకూరి నిర్మిస్తున్న ఈ సినిమా జూలై 1న విడుదల కానుందని చిత్ర యూనిట్‌ గతంలో ప్రకటించింది. అయితే ఇప్పుడా విడుదల తేది మరింత ముందుకు వచ్చింది. ఈనెల 17న ప్రపంచవ్యాప్తంగా ఈ చిత్రాన్ని థియేటర్లో విడుదల చేస్తున్నట్టు మేకర్స్‌ వెల్లడించారు.
'1990లలో జరిగిన యదార్థ సంఘటనల నుండి ప్రేరణ పొంది తెరకెక్కించిన ఈ చిత్రంలో రానా కామ్రేడ్‌ రవన్న పాత్రను పోషించారు. వెన్నెల పాత్రలో సాయి పల్లవి కనిపించనుంది. యుద్ధం నేపథ్యంలో సాగే ఓ అద్భుతమైన ప్రేమకథగా ఈ సినిమా ఉండబోతుంది. ఈ చిత్రకథను దర్శకుడు
వేణు ఊడుగుల అత్యద్భుతంగా వెండితెరపై ఆవిష్కరించారు. రానా, సాయిపల్లవి నటన ప్రేక్షకుల్ని మెస్మరైజ్‌ చేస్తుంది. ప్రియమణి, నందితా దాస్‌, నవీన్‌ చంద్ర, సాయిచంద్‌ వంటి హేమాహేమీల పాత్రలు ప్రేక్షకులు ఊహించని రీతిలో ఉంటాయి. ఆద్యంతం ఆసక్తికరంగా సాగే ఈ చిత్రాన్ని ఈనెల 17న భారీ స్థాయిలో మేకర్స్‌ విడుదల చేస్తున్నారు. ఇక ఈ చిత్ర ప్రమోషన్స్‌ని వినూత్నంగా ఆరంభించబోతున్నారు. 'విరాటపర్వం' వార్తలు పేరుతో ఈ చిత్రానికి సంబంధించి అప్‌డేట్స్‌ని
ప్రేక్షకులతో షేర్‌ చేసుకోబోతున్నారు. ఇందులో భాగంగా ఈనెల 2న ఈ సినిమాలోని 'నాగదారిలో' అంటూ సాగే పాటను రిలీజ్‌ చేస్తున్నారు' అని చిత్ర యూనిట్‌ తెలిపింది.
ప్రియమణి, నందితా దాస్‌, నవీన్‌ చంద్ర, జరీనా వహాబ్‌, ఈశ్వరీ రావ్‌, సాయిచంద్‌, బెనర్జీ, నాగినీడు, రాహుల్‌ రామకష్ణ, దేవీప్రసాద్‌, ఆనంద్‌ రవి, ఆనంద్‌ చక్రపాణి తదితరులు నటిస్తున్న ఈ చిత్రానికి రచన-దర్శకత్వం: వేణు ఊడుగుల, నిర్మాత: సుధాకర్‌ చెరుకూరి, సమర్పణ: సురేష్‌ బాబు, సినిమాటోగ్రఫీ: డానీ సాంచెజ్‌ లోపెజ్‌, దివాకర్‌ మణి, ఎడిటింగ్‌: శ్రీకర్‌ ప్రసాద్‌, ప్రొడక్షన్‌ డిజైన్‌: శ్రీనాగేంద్ర, మ్యూజిక్: సురేష్‌ బొబ్బిలి, స్టంట్స్‌: స్టీఫెన్‌ రిచర్డ్‌, పీటర్‌ హెయిన్‌, కొరియోగ్రఫీ: రాజు సుందరం, ఎగ్జిక్యూటివ్‌ ప్రొడ్యూసర్‌: విజరుకుమార్‌ చాగంటి.
