అక్రమ్‌ సురేష్‌ హీరోగా నటిస్తున్న చిత్రం 'అక్రమ్‌'. రాజధాని అమరావతి మూవీస్‌ పతాకంపై ఎం.వి.ఆర్‌., విసకోటి మార్కండేయులు నిర్మిస్తున్నారు. షూటింగ్‌ పూర్తి చేసుకున్న ఈ చిత్ర టీజర్‌ను బుధవారం ప్రసాద్‌ల్యాబ్‌ ప్రివ్యూ థియేటర్‌లో చిత్ర యూనిట్‌ రిలీజ్‌ చేసింది. ఇదే వేదికపై ఓ పాటను చిత్ర సంగీత దర్శకుడు సాయిదీప్‌, కెమెరామెన్‌ అనిల్‌కుమార్‌ ఆవిష్కరించారు.
ఈ సందర్భంగా మీడియాతో కథానాయకుడు అక్రమ్‌ సురేష్‌ మాట్లాడుతూ,' ఈ సినిమాకి కథతోపాటు డైలాగ్స్‌లు కూడా రాశాను. రావణుడికి మించిన అహం రానాలో ఉంటుంది. రానా, అక్రమ్‌ అనేవారు ఎవరు? అనేది సినిమాలో చూస్తే అర్థమవుతుంది. త్వరలో ట్రైలర్‌ విడుదల చేస్తాం. గీత రచయిత సురేష్‌ బెన్‌ శెట్టి పాటలు బాగా రాశారు. కథలో అన్ని కోణాలున్నాయి. యాక్షన్‌, సోషియో ఫాంటసీ.. ఇలా అన్ని థ్రిల్‌ చేస్తాయి. యాక్షన్‌ సీన్‌ కోసం జాగ్వార్‌ కార్లు లొకేషన్‌లో వాడాం. రాజమౌళి వంటి వారు భారీ సినిమాలు నిర్మించినా, కొత్త వారు అనేసరికి చిన్న చూపు ఉంటుంది. అలాంటి భావన ఉండకూడదనే నేను ఈ రంగంలోకి వచ్చాను. చిన్న సినిమాలోనూ కంటెంట్‌ ఉంటుంది. నన్ను టాలీవుడ్‌ తలైవ అని అంటారు. ఆ పేరు నేను పెట్టుకుంది కాదు. కీ.శే.. తుర్లపాటి కుటుంబరావు గారు పెట్టారు. ఫస్ట్‌ లుక్‌ చూశాక ఆయన పెట్టిన పేరు అది. నేను ఎ.ఎన్‌.ఆర్‌.అభిమానిని. త్వరలో ప్రీరిలీజ్‌ వేడుక చేయబోతున్నాం. దానికి అక్కినేని నాగార్జునగారు ముఖ్యఅతిథిగా రాబోతున్నారు' అని చెప్పారు. ఈ చిత్రానికి ఎగ్జిక్యూటివ్‌ నిర్మాత : శివ శంకర్‌.
