నాని హీరోగా, వివేక్‌ ఆత్రేయ దర్శకత్వంలో మైత్రీ మూవీ మేకర్స్‌ నిర్మిస్తున్న రొమాంటిక్‌ కామెడీ ఎంటర్‌టైనర్‌ 'అంటే సుందరానికీ'. ఈ చిత్ర ట్రైలర్‌ని గురువారం చిత్ర బృందం రిలీజ్‌ చేసింది.
ఈ ట్రైలర్‌కు మంచి స్పందన లభిస్తున్న నేపథ్యంలో చిత్ర యూనిట్‌ మాట్లాడుతూ, 'ఇప్పటికే విడుదలైన టీజర్‌కు అన్ని వర్గాల ప్రేక్షకుల నుండి మంచి రెస్పాన్స్‌ వచ్చింది. ఇపుడు విడుదలైన ట్రైలర్‌ సినిమాపై అంచనాలని భారీగా పెంచింది. సుందర్‌, లీలా థామస్‌ పాత్రలో నాని, నజ్రియాల ప్రేమకథ సరికొత్తగా, మ్యాజికల్‌గా అనిపిస్తుంది. ట్రైలర్‌లో కనిపించిన ప్రతి పాత్ర నవ్వులు పంచింది. సుందర్‌, లీలావి వేరు వేరు ప్రపంచాలు. వారి కుటుంబాలు కూడా పూర్తిగా భిన్నం. సుందర్‌కి ఒక పెద్ద కల ఉంది. దాన్ని సాధించడానికి వాళ్ళ కుటుంబమే పెద్ద అడ్డంకి, ఇది చాలదన్నట్టు సుందర్‌ జీవితంలోకి లీలా వస్తుంది. తర్వాత కథ ఎలాంటి ఆసక్తికరమైన మలుపు తిరిగిందో తెలుసుకోవాలంటే మా 'అంటే సుందరానికీ' చూడాల్సిందే. దర్శకుడు వివేక్‌ ఆత్రేయ మార్క్‌ ఫన్ అడుగడుగునా ఆకట్టుకుంది. ఈనెల 10న మూడు భాషల్లో ఒకేసారి ఈ సినిమాని ప్రపంచ వ్యాప్తంగా భారీగా విడుదల చేస్తున్నారు. ఈ చిత్రం తమిళ వెర్షన్‌కి 'అడాడే సుందరా' అనే టైటిల్‌ని పెట్టగా, మలయాళ వెర్షన్‌కి 'ఆహా సుందరా' టైటిల్‌ను ఖరారు చేశారు' అని చెప్పారు.
