చాలా కాలంగా ఎదురు చూస్తున్న షారూఖ్‌ఖాన్‌, అట్లీ కాంబినేషన్‌లో రూపొందబోయే సినిమాకి సంబంధించి బిగ్‌ అప్‌డేట్‌ అఫిషియల్‌గా వచ్చింది.
షారూఖ్‌ ఖాన్‌ హీరోగా, అట్లీ దర్శకత్వంలో రెడ్‌ చిల్లీస్‌ ఎంటర్‌టైన్‌మెంట్‌ నిర్మిస్తున్న ఈ భారీ యాక్షన్‌ ఎంటర్‌టైనర్‌కి 'జవాన్‌' అనే టైటిల్‌ని ఖరారు చేశారు. అత్యున్నత స్థాయి తారాగణం, సాంకేతిక నిపుణులతో భారీ యాక్షన్‌ సీక్వెన్సులు ఉన్న ఈ పాన్‌ ఇండియా సినిమా యావత్‌ సినీ ప్రేక్షకులకు ఒక గొప్ప వేడుకలా ఉండబోతుందనే దీమాని చిత్ర బృందం వ్యక్తం చేసింది.
దక్షిణాదిలో 'రాజా రాణి', 'థేరి', 'మెర్సల్‌', 'బిగిల్‌' వంటి బ్లాక్‌బస్టర్‌ చిత్రాలకు దర్శకత్వం వహించారు అట్లీ. భారీ అంచనాలు ఉన్న 'జవాన్‌'తో తన మ్యాజిక్‌ను దేశ వ్యాప్తంగా మరోమారు చూపించడానికి రెడీ అవుతున్నారు. టైటిల్‌తోపాటు రిలీజ్‌ చేసిన టీజర్‌ అందర్నీ విశేషంగా అలరిస్తోంది. ఈ టీజర్‌లో షారుఖ్‌ విపరీతమైన గాయల కట్లతో రగ్గడ్‌ బ్యాక్‌ డ్రాప్‌లో కనిపించారు. ఈ ఫస్ట్‌ లుక్‌ 'జవాన్‌' లార్జర్‌ దేన్‌ లైఫ్‌ యాక్షన్‌ ఎంటర్‌టైనర్‌గా ఉంటుందని చెప్పకనే చెప్పింది. హిందీ, తమిళం, తెలుగు, మలయాళం, కన్నడ భాషలలో ఈ చిత్రాన్ని వచ్చే ఏడాది జూన్‌ 2న ప్రపంచవ్యాప్తంగా థియేటర్లలో విడుదల చేసేందుకు మేకర్స్‌ సన్నాహాలు చేస్తున్నారు.
ఈ చిత్రం గురించి షారుఖ్‌ ఖాన్‌ మాట్లాడుతూ, ''భాషలు, ప్రాంతాలకు అతీతంగా అందరూ ఆస్వాదించే యూనివర్సల్‌ కథతో ఈ చిత్రం ఉంటుంది. ఈ విలక్షణమైన చిత్రాన్ని రూపొందించిన క్రెడిట్‌ దర్శకుడు అట్లీకి దక్కుతుంది. టీజర్‌ రాబోయే అద్భుతానికి చిన్న గ్లింప్స్‌ లాంటింది మాత్రమే'' అని అన్నారు.
'ఇందులో యాక్షన్‌, ఎమోషన్‌, డ్రామాతోపాటు సినిమా అంతా విజువల్‌ వండర్‌గా ఉంటుంది. ప్రేక్షకులకు గొప్ప అనుభూతిని అందించాలనుకుంటున్నాను. ప్రేక్షకులంతా కలసి ఎంజారు చేయగల గొప్ప చిత్రాన్ని షారూఖ్‌ తప్ప మరెవరూ అందించగలరు. మునుపెన్నడూ లేని విధంగా ఈ చిత్రం ఉండబోతుంది' అని దర్శకుడు అట్లీ చెప్పారు.
