సత్య ఐపీఎస్‌ పాత్రలో యువ హీరో రామ్‌, విజిల్‌ మహాలక్ష్మిగా కతి శెట్టి... జంటగా నటించిన సినిమా 'ది వారియర్‌'.
తెలుగు, తమిళ భాషల్లో తెరకెక్కుతోంది. తమిళ అగ్ర దర్శకుడు లింగుస్వామి దర్శకత్వం వహిస్తున్నారు. పవన్‌ కుమార్‌ సమర్పణలో శ్రీనివాసా సిల్వర్‌ స్క్రీన్‌ పతాకంపై ప్రొడక్షన్‌ నెం. 6గా శ్రీనివాసా చిట్టూరి నిర్మిస్తున్నారు. ఈ సినిమా చిత్రీకరణ పూర్తయింది. జూలై 14న సినిమా ప్రేక్షకుల ముందుకు వస్తోంది. ఈ చిత్రంలోని రెండో పాట 'దడ దడ...'ను అగ్ర దర్శకులు గౌతమ్‌ మీనన్‌ విడుదల చేశారు.
         'దడదడమని హృదయం శబ్దం... నువ్వు ఇటుగా వస్తావని అర్థం! బడబడ మని వెన్నెల వర్షం... నువ్వు ఇక్కడే ఉన్నావని అర్థం..' అంటూ సాగిన ఈ గీతానికి దేవిశ్రీ ప్రసాద్‌ శ్రావ్యమైన మెలోడీ బాణీ సమకూర్చగా, శ్రీమణి సాహిత్యం అందించారు. హరిచరణ్‌ పాటను ఆలపించారు. ఈ సందర్భంగా నిర్మాత శ్రీనివాసా చిట్టూరి మాట్లాడుతూ, 'పాటను విడుదల చేసిన గౌతమ్‌ మీనన్‌ గారికి థ్యాంక్స్‌. కొన్ని క్షణాల్లో సాంగ్‌ వైరల్‌ అయ్యింది. హైదరాబాద్‌లోని అందమైన లొకేషన్స్‌లో పాటను చిత్రీకరించాం. అందరూ హమ్‌ చేసే విధంగా దేవిశ్రీ ప్రసాద్‌ మంచి మెలోడీ అందించారు. ఆల్రెడీ విడుదలైన 'బుల్లెట్‌...' సాంగ్‌కు టెర్రిఫిక్‌ రెస్పాన్స్‌ లభిస్తోంది. సినిమాలో పాటలన్నీ వేటికవే వైవిధ్యంగా ఉంటాయి. ప్రస్తుతం పోస్ట్‌ ప్రొడక్షన్‌ పనులు జరుగుతున్నాయి. జూలై 14న ప్రపంచవ్యాప్తంగా తెలుగు, తమిళ భాషల్లో భారీ ఎత్తున సినిమాను విడుదల చేస్తాం' అని చెప్పారు.