ఆది సాయి కుమార్‌ హీరోగా నటిస్తున్న తాజా చిత్రానికి 'టాప్‌ గేర్‌' అనే టైటిల్‌ని ఖరారు చేశారు.
ఆదిత్య మూవీస్‌ అండ్‌ ఎంటర్‌టైన్‌మెంట్స్‌ సమర్పణలో శ్రీ ధనలక్ష్మి ప్రొడక్షన్స్‌ బ్యానర్‌పై అన్ని హంగులతో ఈ సినిమా రాబోతోంది. ఈ సినిమాలో రియా సుమన్‌ హీరోయిన్‌గా నటిస్తోంది.
శశికాంత్‌ దర్శకత్వంలో కె.వి.శ్రీధర్‌ రెడ్డి ఈ చిత్రాన్ని అత్యంత ప్రతిష్టాత్మకంగా నిర్మిస్తున్నారు.
లేటెస్ట్‌గా ఈ సినిమా టైటిల్‌ లాంచ్‌ వేడుకను హైదరాబాద్‌లోని శ్రీనిధి ఇంజనీరింగ్‌ కాలేజీలో ఘనంగా నిర్వహించారు.
వేలాది మంది స్టూడెంట్స్‌ సమక్షంలో ఈ టైటిల్‌ లోగో లాంచ్‌ చేయడం విశేషం. ఈ సందర్భంగా చిత్ర యూనిట్‌ మాట్లాడుతూ, 'టైటిల్‌ లుక్‌ చూస్తుంటే ఈ సినిమాలో అన్ని వర్గాల ఆడియెన్స్‌కి కనెక్ట్‌ అయ్యే ఓ డిఫరెంట్‌ పాయింట్‌ చూపించబోతున్నారని స్పష్టమవుతోంది. ఈ సినిమా తన కెరీర్‌లో ఎంతో ప్రత్యేకం కానుందని హీరో ఆది సాయి కుమార్‌ చెప్పడం సినిమాపై అంచనాలు పెంచేసింది. పలు సూపర్‌ హిట్‌ సినిమాలకు సినిమాటోగ్రాఫర్‌గా సేవలందించిన సాయి శ్రీరామ్‌ ఈ సినిమా కోసం పని చేస్తున్నారు. హర్ష వర్ధన్‌ రామేశ్వర్‌ సంగీతం సమకూర్చటం ఈ సినిమాకి మరో బిగ్గెస్ట్‌ ప్లస్ పాయింట్‌. 'జులాయి', 'అత్తారింటికి దారేది', 'సన్నాఫ్‌ సత్యమూర్తి', 'మనం', 'సోగ్గాడే చిన్నినాయనా' వంటి సూపర్‌ హిట్‌ సినిమాలకు ఎడిటర్‌గా పని చేసిన ప్రవీణ్‌ పూడి ఈ చిత్రానికి కూడా ఎడిటర్‌గా వ్యవహరిస్తున్నారు' అని చెప్పారు. బ్రహ్మాజీ, సత్యం రాజేష్‌, మైమ్‌ గోపి, నర్రా, శత్రు, బెనర్జీ, గిరిధర్‌, మిర్చి హేమంత్‌ నటిస్తున్న ఈ చిత్రానికి కథ, స్క్రీన్‌ ప్లే, దర్శకత్వం: శశికాంత్‌, ఆర్ట్‌: రామాంజనేయులు, ఎగ్జిక్యూటివ్‌ ప్రొడ్యూసర్‌: గిరిధర్‌ మామిడిపల్లి.
