గోపీచంద్‌, మారుతి కాంబినేషన్‌లో రూపొందుతున్న సినిమా 'పక్కా కమర్షియల్‌'.
అల్లు అరవింద్‌ సమర్పణలో జీఏ2 పిక్చర్స్‌ - యూవీ క్రియేషన్స్‌ పతాకాలపై బన్నీ వాసు నిర్మిస్తున్న చిత్రమిది.
ఇప్పటికే విడుదలైన టీజర్‌, పాటలకు అద్భుతమైన రెస్పాన్స్‌ వచ్చింది. తాజాగా రిలీజ్‌ చేసిన టైలర్‌కి కూడా మంచి స్పందన లభిస్తోంది.
ఈ నేపథ్యంలో చిత్ర బృందం మాట్లాడుతూ, 'టైటిల్‌కి తగ్గట్టు గానే సినిమా ఉంటుందనే విషయాన్ని ట్రైలర్‌ చెప్పకనే చెప్పింది. 'మీతో సెల్యూట్‌ కొట్టించుకోడానికి నేను హీరో కాదురా.. విలన్‌' అంటూ హీరో గోపీచంద్‌ చెప్పిన డైలాగ్‌ అదిరిపోయింది. ట్రైలర్‌ అంతా పక్కా కమర్షియల్‌ కోణంలో ఉంది. రాశీ ఖన్నా డైలాగ్స్‌ కూడా ఆద్యంతం ఆకట్టుకున్నాయి. సత్యరాజ్‌, రావు రమేష్‌ పాత్రలు విభిన్నంగా డిజైన్‌ చేశారు మారుతి. గోపీచంద్‌ క్యారెక్టర్‌ను మారుతి అద్భుతంగా రాశారని చెప్పటానికి ఆయన బాడీ లాంగ్వేజ్‌, డైలాగ్స్‌ ప్రత్యక్ష ఉదాహారణలుగా నిలుస్తున్నాయి. కెరీర్లో ఎప్పుడూ లేనంత కొత్తగా గోపీచంద్‌ చాలా స్టైలిష్‌గా కనిపిస్తున్నారు. 'భలే భలే మగాడివోరు', 'టాక్సీవాలా', 'ప్రతి రోజు పండగే' లాంటి విజయాలతో అపజయమే లేని జీఏ2 పిక్చర్స్‌ - యూవీ క్రియేషన్స్‌ - బన్నీవాసు - కాంబినేషన్‌లో ఈ సినిమా వస్తుండటంతో అందరిలోనూ అంచనాలు పెరిగాయి. గతంలో ఈ బ్యానర్స్‌ నుంచే దర్శకుడు మారుతి 'భలేభలే మగాడివోరు', 'ప్రతిరోజు పండగే' వంటి బ్లాక్‌బస్టర్స్‌ అందించారు. 'ప్రతి రోజు పండగే' సినిమా తర్వాత సత్యరాజ్‌ మరోసారి ఈ సినిమాలో కీలక పాత్రలో నటిస్తున్నారు. సిరివెన్నెల సీతారామశాస్త్రి రాసిన టైటిల్‌ సాంగ్‌కు మంచి రెస్పాన్స్‌ వచ్చింది. ఇప్పటికే చిత్రీకరణ పూర్తి చేసుకున్న ఈ సినిమా పోస్ట్‌ ప్రొడక్షన్‌ పనులు శరవేగంగా జరుగుతున్నాయి. జూలై 1న ఈ సినిమాను ప్రపంచవ్యాప్తంగా భారీ స్థాయిలో రిలీజ్‌ చేసేందుకు మేకర్స్‌ సన్నాహాలు చేస్తున్నారు' అని చెప్పారు. ఈ చిత్రానికి సహ నిర్మాత - ఎస్‌ కే ఎన్‌, లైన్‌ ప్రొడ్యూసర్‌ - బాబు.
