కొండా మురళి, కొండా సురేఖ దంపతుల జీవిత కథ ఆధారంగా రూపొందిన సినిమా 'కొండా'. రామ్‌ గోపాల్‌ వర్మ దర్శకుడు. కొండా మురళి పాత్రలో త్రిగుణ్‌, సురేఖ పాత్రలో ఇర్రా మోర్‌ నటించారు. శ్రేష్ఠ పటేల్‌ మూవీస్‌ పతాకంపై కొండా సుష్మితా పటేల్‌ నిర్మించారు. ఈనెల 23న సినిమా విడుదల కానుంది.
ఈ సందర్భంగా కథానాయిక ఇర్రా మోర్‌ గురువారం మీడియాతో పలు విశేషాలను షేర్‌ చేసుకున్నారు.
భైరవగీతతో స్టార్ట్‌..
           రామ్‌ గోపాల్‌ వర్మ గారు 'భైరవగీత' సినిమా కోసం ఆడిషన్‌ ఇవ్వమని అడిగారు. ఆ సినిమాకు వర్మ గారి శిష్యుడు సిద్ధార్థ్‌ దర్శకత్వం వహించారు. ఆ సినిమాతో నా కెరీర్‌ స్టార్ట్‌ అయ్యింది. 'భైరవగీత' తర్వాత రెండు వెబ్‌ సిరీస్‌లు చేశా. లాక్‌డౌన్‌లో ఉన్నప్పుడు వర్మ గారు 'కొండా' సినిమా స్క్రిప్ట్‌ పంపారు. నాకు సురేఖమ్మ పాత్ర బాగా నచ్చింది. కాలేజీ జీవితం నుంచి రాజకీయ ప్రయాణం వరకూ ఆమె జీవితంలో ఎన్నో ఎత్తుపల్లాలు ఉన్నాయి. నటిగా పెర్ఫార్మన్స్‌కు స్కోప్‌ ఉన్న రోల్‌.
నా శైలిలో నటించా..
           స్క్రిప్ట్‌ చదివాక, యూట్యూబ్‌లో సురేఖగారి వీడియోస్‌ చూశా. ఆ తర్వాత మా ఇంట్లో లుక్‌ టెస్ట్‌ చేశా. శారీ కట్టుకుని చూశా. ఆమె రాజకీయ నాయకురాలు కూడా! అందువల్ల, ఎటువంటి దుస్తులు వేసుకోవాలి? ఏవి వేసుకోకూడదు? అని డిస్కస్‌ చేసుకున్నాం. వర్మ గారితో మాట్లాడి సురేఖమ్మ గురించి తెలుసుకున్నా. ఆ తర్వాత ఆమెతోనూ మాట్లాడాను. ముఖ్యంగా ఇంటర్వ్యూల్లో ఎలా మాట్లాడేవారు? అనేది చూశా. ఆవిడను కాపీ చేయాలనుకోలేదు. నా శైలిలో నటించా. కానీ, ఆవిడ వ్యక్తిత్వం పాత్రలో కనిపించేలా చూసుకున్నా.
మా ఇద్దరి కామన్‌ క్వాలిటీ అదే
           సురేఖగారు వెరీ స్ట్రాంగ్‌ లేడీ. జీవితంలో ఆవిడ ఎన్నో మంచి పనులు చేశారు. ఆవిడ కఠిన పరిస్థితులను తట్టుకుని నిలబడ్డారు. నా జీవితం ఇప్పుడే మొదలైంది. మా ఇద్దరికీ చాలా వ్యత్యాసం ఉంది. ఆవిడతో కంపేర్‌ చేసుకోలేను. మా మధ్య ఉన్న ఒక్క కామన్‌ పాయింట్‌ ఏంటంటే... నేను కూడా స్ట్రాంగ్‌. భయపడకూడదని నా తల్లిదండ్రులు చెప్పారు. సురేఖమ్మలా నటించి ప్రజల గౌరవం సంపాదించుకోవడం ముఖ్యంగా భావించా. సినిమా చూశాక, ప్రేక్షకులు నన్ను గౌరవిస్తారని ఆశిస్తున్నాను. కొండా మురళిగారి పాత్రలో త్రిగుణ్‌ అద్భుతంగా నటించాడు.
సుష్మిత మెచ్చుకున్నారు
           సురేఖమ్మ గారి అమ్మాయి సుష్మిత రషెస్‌ చూసి, ఫోన్‌ చేశారు. ఇంటర్వెల్‌ బ్లాక్‌లో కొండా మురళి గారిని కాల్చే సన్నివేశం వస్తుంది. నిజంగా జరిగినప్పుడు సుష్మిత ఆయన దగ్గర ఉన్నారు. సినిమా స్టార్ట్‌ చేసే ముందు నేను ముంబై నుంచి వచ్చిన అమ్మాయిని కాబట్టి ఎలా యాక్ట్‌ చేస్తానోనని అనుకున్నారట. ఇంటర్వెల్‌ సీన్‌ చూశాక మెచ్చుకున్నారు. సురేఖమ్మ పాత్రకు వెయ్యి శాతం న్యాయం చేశానని చెప్పారు. 'కొండా' చిత్రీకరణ చేసేటప్పుడు వరంగల్‌లోని మురళి, సురేఖమ్మ గారి గెస్ట్‌ హౌస్‌లో ఉన్నాం. వాళ్ళ ఫ్యామిలీతో చాలా కలిసిపోయాం.