లెజెండరీ నిర్మాత ఏడిద నాగేశ్వరరావు స్థాపించిన పూర్ణోదయ సంస్థ ఇప్పుడు శ్రీజ ఎంటర్‌టైన్‌మెంట్స్‌తో తిరిగి నిర్మాణంలోకి వచ్చింది. మిత్రవింద మూవీస్‌తో కలిసి ఏడిద నాగేశ్వరరావు మనవరాలు శ్రీజ 'ఫస్ట్‌ డే ఫస్ట్‌ షో' చిత్రాన్ని నిర్మిస్తుండగా, ఆయన కుమారుడు ఏడిద శ్రీరామ్‌ ఈ చిత్రాన్ని సమర్పిస్తున్నారు.
సరికొత్త కామెడీ ఎంటర్‌ టైనర్‌గా తెరకెక్కుతున్న ఈ చిత్రానికి రాధన్‌ సంగీతం అందిస్తున్నారు. తాజాగా ఈ చిత్రం నుండి మొదటి లిరికల్‌ వీడియో 'మజ్జా మజ్జా'ని విడుదల చేసి, ఆడియో ప్రమోషన్‌ని చిత్ర యూనిట్‌ ప్రారంభించింది.
హీరో తన ప్రేయసి ఉద్దేశించి పాడుకున్న ఈ పాట కాలేజీ నేపథ్యంలో క్లాస్‌గా మొదలై పెప్పీ డ్యాన్స్‌ నెంబర్‌గా టర్న్‌ తీసుకోవడం ఆసక్తికరంగా ఉంది. వంశీధర్‌ గౌడ్‌, వాసు వలబోజుల తెలంగాణ యాసలో పాటకి రాసిన సాహిత్యం క్యాచిగా ఉండటం విశేషం. 'నా గుండె గిలాగిలా కొట్టుకుంటాందే..నా పాణం విలావిలా మొత్తుకుంటునాదే..నీవు చూడకు జర నవ్వుకు నన్ను ఆగం చెయ్యకే..' అంటూ సాగే ఈ పాటలో వినిపించిన లిరిక్స్‌ సరదాగా అలరిస్తున్నాయి. ఆంథోని దాసన్‌ ఫుల్‌ ఎనర్జిటిక్‌గా పాడిన ఈ పాటకు విశ్వ రఘు మాస్టర్‌ డిఫరెంట్‌ కొరియోగ్రఫీ అందించారు. శ్రీకాంత్‌ రెడ్డి తన డ్యాన్స్‌ మూమెంట్స్‌తో ఆకట్టుకున్నాడు. సంచితా బషు అందంగా కనిపించింది. 'జాతిరత్నాలు' దర్శకుడు అనుదీప్‌ కెవి ఈ సినిమాకి సంబంధించి రైటింగ్‌ విభాగంలో ఉన్నారు. ఈ చిత్రానికి కథ అందించిన అనుదీప్‌, వంశీధర్‌ గౌడ్‌, కళ్యాణ్‌తో పాటు స్క్రీన్‌ ప్లే కూడా అందించారు. ఈ చిత్రానికి డైలాగ్స్‌ను అనుదీప్‌ కెవి, వంశీధర్‌ గౌడ్‌ రాశారు.
శ్రీకాంత్‌ రెడ్డి, సంచిత బషు జంటగా నటిస్తున్న ఈ చిత్రానికి వంశీధర్‌ గౌడ్‌, లక్ష్మీనారాయణ పి సంయుక్తంగా దర్శకత్వం వహిస్తున్నారు. ఈ సినిమా నుంచి విడుదలైన తొలిపాట అందర్నీ విశేషంగా అలరిస్తూ, సినిమాపై అంచనాలను పెంచింది' అని చిత్ర బృందం తెలిపింది.
తనికెళ్ల భరణి, వెన్నెల కిషోర్‌, శ్రీనివాస్‌ రెడ్డి, మహేష్‌ ఆచంట, ప్రభాస్‌ శ్రీను, గంగవ్వ, సివిఎల్‌ నరసింహారావు, వంశీధర్‌ గౌడ్‌, సాయి చరణ్‌ బొజ్జా తదితరులు నటిస్తున్న ఈచిత్రానికి సంగీతం: రాధన్‌, డీవోపీ: ప్రశాంత్‌ అంకిరెడ్డి, ఎడిటర్‌: మాధవ్‌.
