''దళం', 'జార్జ్‌ రెడ్డి' చిత్రాలతో దర్శకుడిగా తనకంటూ ఓ ప్రత్యేకతను సొంతం చేసుకున్నారు జీవన్‌ రెడ్డి.
ఆకాష్‌ పూరి హీరోగా ఆయన రూపొందించిన కొత్త సినిమా 'చోర్‌ బజార్‌'. గెహనా సిప్పీ నాయికగా నటించింది. యూవీ క్రియేషన్స్‌ సంస్థ సమర్పణలో ఐవీ క్రియేషన్స్‌ పతాకంపై వీఎస్‌ రాజు నిర్మించిన ఈ సినిమా ఈ నెల 24న రిలీజ్‌ కానుంది.
ఈ సందర్భంగా సోమవారం దర్శకుడు జీవన్‌ రెడ్డి మీడియాతో ముచ్చటించారు.
నా గత చిత్రాలైన దళం, జార్జ్‌ రెడ్డికి భిన్నంగా పూర్తి ఎంటర్‌టైన్‌మెంట్‌తో రూపొందించిన చిత్రమిది. బ్లడ్‌ షెడ్‌ లేకుండా వినోదాత్మక సినిమా చేయాలని భావించే ఈ చిత్రాన్ని తెరకెక్కించా.
దాదాపు 35 రోజులు రాత్రి పూట షూటింగ్‌ చేశాం. సన్నివేశాలన్నీ బ్రైట్‌గా, కలర్‌ఫుల్‌గా రావడానికి మా సినిమాటోగ్రాఫర్‌ జగదీశ్‌ టాలెంట్‌ కారణం. హైదరాబాద్ పాతబస్తీలో ఉన్న చోర్‌ బజార్‌కు నేను వెళ్తుండేవాడిని. అక్కడి మనుషుల స్వభావం ఆకట్టుకుంది. వాళ్లు వస్తువులు దొంగతనం చేయరు. మనం వద్దు అనుకుని పడేసిన వస్తువులను సేకరించి, తక్కువ ధరలకు అమ్ముతుంటారు. ఏమాత్రం గుర్తింపు లేని మనుషులు వారు. ఆధార్‌ కార్డులు కూడా ఉండవు. వాళ్లను అడిగితే మాకు ఓటు హక్కు లాంటి కనీస గుర్తింపు లేదని బాధపడుతుంటారు. ఇలాంటి అంశాల్ని సినిమాలో ప్రస్తావించాం.
ఇందులో హీరోయిన్‌కు మూగ పాత్ర ఇవ్వడానికి కారణం. ఆమెకు మాట్లాడటం రాకున్నా ఇప్పుడున్న టెక్నాలజీ, సోషల్‌ మీడియా ద్వారా మాట్లాడించాం. సినిమా ప్రధానంగా లవ్‌ స్టోరీ అయినప్పటికీ ఒక విలువైన డైమండ్‌ చుట్టూ తిరుగుతుంది. వంద కోట్ల రూపాయల విలువైన డైమండ్‌ చోర్‌ బజార్‌లో ప్రత్యక్షమవుతుంది. కానీ అక్కడి వాళ్లకు దాని విలువ తెలియదు. పది రూపాయలకే అమ్ముతుంటారు. ఈ డైమండ్‌ చుట్టూ డ్రామా, ఫన్ క్రియేట్‌ అవుతాయి. నిర్మాత, నా స్నేహితుడు రాజు ఈ సినిమాని ఎక్కడా రాజీపడకుండా నిర్మించారు. ఇలాంటి స్నేహితులు దొరకటం అరుదు. ఈనెల 24న రిలీజ్‌ అవుతున్న ఈ సినిమా అన్ని వర్గాల ప్రేక్షకుల్ని కచ్చితంగా అలరిస్తుందనే నమ్మకం ఉంది. మంచి కథలతోనే సినిమాలు తీస్తాను. త్వరలో ఓ ఇంట్రెస్టింగ్‌ ప్రాజెక్ట్‌ చేయబోతున్నాను.
చోర్‌ బజార్‌లో నేను చూసిన మనుషులు రాత్రంతా బిజినెస్ చేసి, పగలు నిద్రపోతుంటారు. పగలు ఒక జీవితం, రాత్రి మరో జీవితం గడుపుతుటారు. ప్రతి ఒక్కరూ ఒక్కో హీరోను అభిమానిస్తారు. ఆ స్ఫూర్తితోనే మా చిత్రంలో హీరోకు బచ్చన్‌ సాబ్‌ అనే పేరు పెట్టాం. రికార్డుల కోసం తాను చేసే వీడియోలు వైరల్‌ అవుతుంటాయి. ఆకాష్‌ పూరి నేను అనుకున్న పాత్రకు వందశాతం న్యాయం చేశాడు. వాయిస్‌, యాక్షన్‌, పాటల్లో డాన్సులు, పర్మార్మెన్స్‌ ఇలా పర్పెక్ట్‌గా బచ్చన్‌ సాబ్‌ పాత్రను పోషించాడు.
