చిరంజీవి తాజాగా నటిస్తున్న ప్రతిష్టాత్మక చిత్రం 'గాడ్‌ ఫాదర్‌'. కొణిదెల ప్రొడక్షన్‌ కంపెనీ, సూపర్‌ గుడ్‌ ఫిల్మ్స్‌ సంయుక్త నిర్మాణంలో మోహన్‌ రాజా దర్శకత్వంలో ఈ చిత్రం రూపొందుతోంది. ఈ చిత్రం నుండి ఓ మెగా అప్‌డేట్‌ వచ్చింది. 'గాడ్‌ఫాదర్‌' ఫస్ట్‌ లుక్‌ పోస్టర్‌ను ఈనెల 4 సాయంత్రం 5:45 గంటలకు లాంచ్‌ చేయనున్నారు. 'గాడ్‌ఫాదర్‌' రాక కోసం ప్రజలు ఎదురు చూస్తున్నట్లు చిత్ర యూనిట్‌ ఓ పవర్‌ఫుల్‌ పోస్టర్‌ ద్వారా ఫస్ట్‌లుక్‌ డేట్‌ని ప్రకటించింది.
               'బాలీవుడ్‌ స్టార్‌ సల్మాన్‌ ఖాన్‌ ఈ చిత్రంతో టాలీవుడ్‌ అరంగేట్రం చేస్తున్నారు. ఇద్దరు మెగాస్టార్ల ఫ్యాన్స్‌ని ఉర్రూతలూగించే ఓ బాబింగ్‌ సాంగ్‌ ఉంది. ఈ స్పెషల్‌ డ్యాన్స్‌ నెంబర్‌కు ప్రభుదేవా కొరియోగ్రఫీ చేయగా, సంగీతం అదిరిపోయే మ్యూజిక్‌ అందించారు. నయనతార కీలక పాత్రలో నటిస్తుండగా, పూరి జగన్నాధ్‌ అతిథి పాత్రలో కనిపించనున్నారు. ఓ కీలక పాత్రలో సత్యదేవ్‌ కూడా మెరవబోతున్నారు. టాప్‌ టెక్నికల్‌ టీమ్‌ ఈ సినిమా కోసం పని చేస్తున్నారు. లెజెండరీ సినిమాటోగ్రాఫర్‌ నీరవ్‌ షా ఈ చిత్రానికి ఛాయాగ్రహణం అందిస్తుండగా, సంగీత సంచలనం ఎస్‌ఎస్‌ తమన్‌ మ్యూజిక్‌ సమకూరుస్తున్నారు. పలు బాలీవుడ్‌ హిట్‌ చిత్రాలకు ఆర్ట్‌ డైరెక్టర్‌గా పని చేసిన సురేష్‌ సెల్వరాజన్‌ ఈ చిత్రానికి కళాదర్శకత్వం వహిస్తున్నారు. ఆర్‌బి చౌదరి, ఎన్వీ ప్రసాద్‌ సంయుక్తంగా నిర్మిస్తున్న ఈ చిత్రాన్ని కొణిదెల సురేఖ సమర్పిస్తున్నారు' అని చిత్ర యూనిట్‌ పేర్కొంది.