నాని, నూతన దర్శకుడు శ్రీకాంత్‌ ఓదెల కాంబినేషన్‌లో రూపొందుతున్న చిత్రం 'దసరా'. శ్రీ లక్ష్మీ వెంకటేశ్వర సినిమాస్‌ పతాకంపై సుధాకర్‌ చెరుకూరి ఈ చిత్రాన్ని నిర్మిస్తున్నారు. తాజాగా ఈ చిత్రానికి సంబంధించి నూతన షెడ్యూల్‌ ప్రారంభమైంది. ఈ భారీ షెడ్యూల్‌లో ప్రధాన తారాగణం మొత్తం షూటింగ్‌లో పాల్గొంటున్నారు. దీనికోసం హైదరాబాద్‌లో భారీ సెట్‌ వేశారు.
'ఈ సినిమాలో నాని మునుపెన్నడూ చేయని మాస్‌ రోల్‌లో నటించడంతోపాటు తెలంగాణ యాసలో డైలాగ్స్‌ చెప్పనుండటం ఓ విశేషమైతే, నాని నటిస్తున్న తొలి పాన్‌ ఇండియా సినిమా 'దసరా' కావడం మరో విశేషం. తాజాగా విడుదల చేసిన స్టిల్‌లో నాని లుంగీ, బనియన్‌తో పక్కా మాస్‌ అవతార్‌లో కనిపిస్తున్నారు. కోల్‌ మైన్‌ పై నిలబడి బీడీ తాగుతున్న లుక్‌ ఫుల్‌ మాసీగా ఉంది. గోదావరిఖనిలోని సింగరేణి కోల్‌మైన్స్‌ దగ్గర ఉన్న ఒక గ్రామం నేపథ్యంలో జరిగే కథ ఇది. కీర్తి సురేష్‌ ఈ చిత్రంలో నాని సరసన కథానాయికగా కనిపించనుంది. గత షెడ్యూల్‌లో స్టంట్‌ డైరెక్టర్‌ అన్బరీవ్‌ ఆధ్వర్యంలో భారీ యాక్షన్‌ ఎపిసోడ్‌ను చిత్రీకరించారు. అంతకు ముందు నాని, కీర్తి సురేష్‌పై ఓ భారీ పాట చిత్రీకరించారు. 'ఆర్‌ఆర్‌ఆర్‌'లోని 'నాటు నాటు' పాట కొరియోగ్రఫీ అందించి యావత్‌ దేశాన్ని ఉర్రూతలూగించిన ప్రేమ్‌ రక్షిత్‌ మాస్టర్‌ కొరియోగ్రఫీలో 500 మంది డ్యాన్సర్లతో ఈ పాటని అద్భుతంగా చిత్రీకరించారు. ఇప్పటికే విడుదలైన 'దసరా' గ్లింప్స్‌కు ప్రేక్షకుల నుండి భారీ స్పందన వచ్చింది. నాని మాస్‌ గెటప్‌, టెర్రిఫిక్‌ అవతార్‌ ప్రేక్షకులని ఆశ్చర్యపరిచింది' అని చిత్ర బృందం తెలిపింది.
