ప్రేక్షకులు, అభిమానులు ఎంతగానో ఎదురుచూస్తున్న చిరంజీవి 'గాడ్‌ఫాదర్‌' చిత్ర ఫస్ట్‌లుక్‌ పోస్టర్‌ను మేకర్స్‌ విడుదల చేశారు. తొలిసారి సాల్ట్‌ అండ్‌ పెప్పర్‌ లుక్‌లో, బ్లాక్‌ షేడ్స్‌ ధరించి, కుర్చీలో కూర్చున్న మెగాస్టార్‌ ఫ˜స్ట్‌ లుక్‌ పోస్టర్‌ పవర్‌ఫుల్‌గా ఉంటూ 'గాడ్‌ఫాదర్‌' టైటిల్‌ని జస్టిఫై చేసేలా ఉందని అందరూ ప్రశంసిస్తున్నారు అని చిత్ర యూనిట్‌ పేర్కొంది. చిరంజీవి పాత్రను పరిచయం చేసే గ్లింప్స్‌ వీడియో ఎక్స్‌టార్డినరీగా ఉంది. ఒక కార్యాలయం ముందు వేలాది మంది పార్టీ కార్యకర్తలు వేచి ఉండగా, మెగాస్టార్‌ అంబాసిడర్‌ కారులో రావడం, సునీల్‌ కార్‌ డోర్‌ తీయగానే 'గాడ్‌ ఫాదర్‌'గా చిరు కారు నుండి బయటకు వచ్చి, ఆఫీస్‌లోకి ఫెరోషియస్‌గా నడుచుకుంటూ వచ్చే ఈ గ్లింప్స్‌ వీడియోకి తమన్‌ ఇచ్చిన బీజీఎం అద్భుతంగా ఉంది. చిరు పాత్రని మరింతగా ఎలివేట్‌ చేసిందని చిత్ర బృందం తెలిపింది. మోహన్‌ రాజా దర్శకత్వంలో ఈ చిత్రాన్ని నిర్మాతలు ఆర్‌బి చౌదరి, ఎన్‌వి ప్రసాద్‌ భారీ స్థాయిలో నిర్మిస్తున్నారు. కొణిదెల సురేఖ ఈ చిత్రాన్ని సమర్పిస్తున్నారు. బాలీవుడ్‌ సూపర్‌ స్టార్‌ సల్మాన్‌ ఖాన్‌ ప్రముఖ పాత్రలో నటిస్తుండగా, నయనతార కీలక పాత్రలో మెరవనుంది. పూరి జగన్నాథ్‌, సత్యదేవ్‌ ఇతర ముఖ్య పాత్రల్ని పోషించిన ఈ చిత్రాన్ని దసరా కానుకగా ప్రపంచవ్యాప్తంగా విడుదల చేస్తున్నట్లు నిర్మాతలు ప్రకటించారు. ఈ చిత్రానికి స్క్రీన్‌ ప్లే, దర్శకత్వం: మోహన్‌ రాజా, నిర్మాతలు: ఆర్‌.బి చౌదరి, ఎన్వీ ప్రసాద్‌, సమర్పణ: కొణిదెల సురేఖ, బ్యానర్లు: కొణిదెల ప్రొడక్షన్స్‌, సూపర్‌ గుడ్‌ ఫిల్మ్స్‌, సంగీతం: ఎస్‌ ఎస్‌ తమన్‌, డీవోపీ: నీరవ్‌ షా, ఆర్ట్‌ డైరెక్టర్‌: సురేష్‌ సెల్వరాజన్‌, ఎగ్జిక్యూటివ్‌ ప్రొడ్యూసర్‌: వాకాడ అప్పారావు.