హీరో నందమూరి కళ్యాణ్‌ రామ్‌ నటించిన తాజా చిత్రం 'బింబిసార'. నందమూరి తారక రామారావు ఆర్ట్స్‌ పతాకంపై హరికృష్ణ.కె ఈ చిత్రాన్ని నిర్మిస్తున్నారు. 'ఏ టైమ్‌ ట్రావెల్ ఫ్రమ్‌ ఈవిల్‌ టు గుడ్‌' ట్యాగ్‌ లైన్‌. వశిష్ఠ్‌ ఈ చిత్రంతో దర్శకుడిగా పరిచయం అవుతున్నారు. గురుపూర్ణిమ సందర్భంగా బుధవారం ఈ మూవీ నుంచి మొదటి పాటను విడుదల చేశారు.
ఈ సందర్భంగా డైైరెక్టర్‌ వశిష్ట మాట్లాడుతూ, 'మా ట్రైలర్‌కు విశేషమైన స్పందన ఇచ్చిన ఆడియెన్స్‌కు థ్యాంక్స్‌. ఇంత మంచి మ్యూజిక్ ఇచ్చిన చిరంతన్‌ గారి, అద్భుతమైన సాహిత్యం ఇచ్చిన శ్రీమణి గారికి, పాడిన కాళ భైరవకు థ్యాంక్స్‌. ఈ పాట మీ అందరికీ నచ్చిందని ఆశిస్తున్నాను. మా బింబిసారుడి త్రిగర్తల రాజ్యం నుంచి మొదటి పాట. ఇలాంటివి ఇంకా వస్తాయి. కర్మ సిద్దాంతం ఆధారంగా ఈ పాట నేపథ్యాన్ని తీసుకున్నాం. బింబిసారుడు చేసే యుద్ధం ఎలా ఉంటుందో ఆగస్ట్‌ 5న చూస్తారు' అని అన్నారు.
'గురుపూర్ణిమ సందర్భంగా 'ఈశ్వరుడే..' పాటను విడుదల చేసినందుకు ఆనందంగా ఉంది. ఇంత మంచి అవకాశాన్ని నాకు ఇచ్చినందుకు థ్యాంక్స్‌. వశిష్ట్‌కు ఇది ఫస్ట్‌ సినిమా. ఆయనకున్న ప్యాషన్‌ నాకు ప్రతీ మీటింగ్‌లో అర్థమైంది. 'ఈశ్వరుడే' అనే ఈ పాట కర్మ చుట్టూ తిరుగుతుంది. దీన్ని కంపోజ్‌ చేయడం నాకు ఛాలెంజింగ్‌గా అనిపించింది' అని సంగీత దర్శకుడు చిరంతన్‌ భట్‌ చెప్పారు.
గీత రచయిత శ్రీమణి మాట్లాడుతూ, 'ఇంత మంచి పాట రాసే అవకాశం ఇచ్చిన టీంకు థ్యాంక్స్‌. ఎంతో గొప్పగా కంపోజ్‌ చేశారు. కాళ భైరవ గారు తన గాత్రంతో పాటకు ప్రాణం పోశారు' అని తెలిపారు.
