హీరో నిఖిల్‌, చందు మొండేటి కాంబినేషన్‌లో 'కార్తికేయ'కి సీక్వెల్‌గా వస్తున్న చిత్రం 'కార్తికేయ2'. ఈ సినిమాపై అంచనాలు భారీగా ఉన్నాయి. ఇప్పటికే విడుదలైన ట్రైలర్‌కి అద్భుతమైన స్పందన వచ్చింది.
కమర్షియల్‌ చిత్రాలతో పాటు విభిన్నమైన కథలతో నిర్మాణాన్ని కొనసాగిస్తూ విజయాలు సొంతం చేసుకుంటున్న క్రేజీ నిర్మాణ సంస్థలు పీపుల్స్‌ మీడియా ఫ్యాక్టరి, అభిషేక్‌ అగర్వాల్‌ ఆర్ట్స్‌ బేనర్స్‌ పై టి.జి. విశ్వప్రసాద్‌, అభిషేక్‌ అగర్వాల్‌ ఈ చిత్రాన్ని నిర్మిస్తున్నారు.
'శాంతను ఇది నువ్వు ఆపలేని యాగం.. నేను సమిధను మాత్రమే.. ఆజ్యం మళ్లీ అక్కడ మొదలైంది.. ప్రాణత్యాగం చేసే తెగింపు ఉంటేనే దీనిని పొందగలం' అంటూ అదిరిపోయే డైలాగ్స్‌ తో సాగే ట్రైలర్‌ అందర్నీ ఆకట్టుకుంది. ఈ నేపథ్యంలో ఈనెల 6న ఈ చిత్ర థియేట్రికల్‌ ట్రైలర్‌ని విడుదల చేయడానికి సన్నాహాలు జరుగుతున్నాయి. మొదటి ట్రైలర్‌తో ఈ సినిమా పై వచ్చిన అంచనాలకు మించే స్థాయిలో ఈ థియేట్రికల్‌ ట్రైలర్‌ ఉండనుంది. ఇక కాలభైరవ బ్యాగ్రౌండ్‌ స్కోర్‌ ఈ సినిమాకు అదనపు ఆకర్షణ. ప్రతీ ఫ్రేమ్‌ చాలా అద్భుతంగా చూపించారు సినిమాటోగ్రాఫర్‌ కార్తిక్‌ ఘట్టమనేని. టెక్నీషియన్స్‌తో అద్భుతమైన అవుట్‌ పుట్‌ తీసుకున్నారు దర్శకుడు చందూ మొండేటి. 'కార్తికేయ'కు సీక్వెల్‌గా వస్తున్న 'కార్తికేయ 2' అంచనాలు అందుకోవడం కాదు, మించిపోయేలా దర్శకుడు చందూ తెెరకెక్కిస్తున్నారు. ఈ చిత్రంలో నిఖిల్‌కి జంటగా ముగ్ధ పాత్రలో అనుపమ పరమేశ్వరన్‌ నటిస్తోంది. ప్రముఖ బాలీవుడ్‌ నటుడు అనుపమ్‌ ఖేర్‌ ఇందులో కీలక పాత్రలో నటిస్తున్నారు. ఈ సినిమాలో ఆసక్తికరమైన విషయం డాక్టర్‌ కార్తికేయ ప్రయాణం. శ్రీకష్ణుడు చరిత్రలోకి ఎంటరవుతూ కనిపిస్తున్నారు. అన్ని కార్యక్రమాలు పూర్తి చేసుకుని ఈనెల 12న ఈ సినిమా ప్రేక్షకుల ముందుకు రానుంది. శ్రీనివాసరెడ్డి, ప్రవీణ్‌, ఆదిత్యా మీనన్‌, తులసి, సత్య, వైవా హర్ష, వెంకట్‌ తదితరులు నటిస్తున్న ఈ చిత్రానికి కథ-స్క్రీన్‌ప్లే-దర్శకత్వం : చందు మొండేటి, కో-ప్రొడ్యూసర్‌: వివేక్‌ కూచిభొట్ల, మ్యూజిక్: కాలభైరవ, సినిమాటోగ్రాఫర్‌: కార్తీక్‌ ఘట్టమనేని, ఆర్ట్‌ డైరెక్టర్‌: సాహి సురేష్‌.
