'గణేష్‌, వర్ష బొల్లమ్మ జంటగా మా సితార ఎంటర్‌టైన్‌మెంట్స్‌ నిర్మించిన 'స్వాతిముత్యం' చిత్రం ఈనెల 13న విడుదల కావాల్సి ఉండగా, కొన్ని కారణాల వల్ల వాయిదా వేస్తున్నాం. ఈ నిర్ణయం పట్ల మేం సంతోషంగా లేనప్పటికీ, వాయిదా వేయక తప్పడం లేదు. రిలీజ్‌ డేట్‌ని దష్టిలో పెట్టుకుని చిత్రీకరణ, పోస్ట్‌ ప్రొడక్షన్‌ పనులు పూర్తి చేసి, రిలీజ్‌ ప్లాన్‌తో ముందుకు వెళ్లాలనుకున్నాం. కానీ ప్రస్తుత పరిస్థితుల్లో వాయిదా నిర్ణయం తీసుకోక తప్పలేదు' అని మేకర్స్‌ తెలిపారు.
'విడుదల తేదీని ముందుగానే ప్రకటించి, విడుదల ప్రణాళికలతో పక్కాగా సిద్ధంగా ఉన్నప్పటికీ పరిశ్రమ గురించి ఆలోచించి మేం వెనక్కి తగ్గుతున్నాం. కరోనా మహమ్మారి తర్వాత తెలుగు చిత్ర పరిశ్రమ పరిస్థితి అంత గొప్పగా లేదు. ఇంతకుముందులా ప్రేక్షకులు థియేటర్లకు రావడం లేదు. మా సినిమా విడుదలకు సరైన సమయం కుదిరినప్పటికీ, ప్రస్తుతం పరిస్థితితోపాటు ఇతర చిత్రాల నిర్మాతల పరిస్థితి చూసి మా సినిమాను వాయిదా వేయాలని నిర్ణయించుకున్నాం. త్వరలోనే కొత్త విడుదల తేదీని ప్రకటిస్తాం. ప్రేక్షకులు థియేటర్లకు వచ్చి మునుపటి మాదిరిగానే సినిమాలను ఆదరిస్తారని ఆశిస్తున్నాం' అని మేకర్స్‌ అన్నారు. నరేష్‌, రావు రమేష్‌, సుబ్బరాజు, వెన్నెల కిషోర్‌, సప్తగిరి, హర్ష వర్ధన్‌, పమ్మి సాయి, గోపరాజు రమణ, శివ నారాయణ, ప్రగతి, సురేఖావాణి, సునయన, దివ్య శ్రీపాద నటిస్తున్న ఈ చిత్రానికి సంగీతం: మహతి స్వర సాగర్‌, సినిమాటోగ్రఫీ: సూర్య, ఎడిటర్‌: నవీన్‌ నూలి, ఆర్ట్‌: అవినాష్‌ కొల్ల, సమర్పణ: పి.డి.వి. ప్రసాద్‌, నిర్మాత: సూర్యదేవర నాగవంశీ, రచన, దర్శకత్వం: లక్ష్మణ్‌ కె.కృష్ణ.
