ఇంద్రసేన, ఐశ్వర్యరాజ్‌ జంటగా డా.రాజేంద్రప్రసాద్‌, సోనియా అగర్వాల్‌, పృథ్వీరాజ్‌ ముఖ్యపాత్రల్లో రూపొందుతున్న పాన్‌ఇండియా చిత్రం 'శాసనసభ'.
తెలుగు, హిందీ, తమిళ, మలయాళ, కన్నడ భాషల్లో తెరకెక్కుతున్న ఈ చిత్రానికి వేణు మడికంటి దర్శకుడు.
కన్నడంలో ప్రముఖ పారిశ్రామిక వేత్తలుగా పేరుపొందిన తులసీరామ్‌ సాప్పని, షణ్ముగం సాప్పనిలు సాబ్రో ప్రొడక్షన్స్‌ పతాకంపై అత్యంత ప్రతిష్టాత్మకంగా ఈ చిత్రాన్ని నిర్మిస్తున్నారు.
కాగా ఈ చిత్రంలో సీనియర్‌ నటుడు రాజేంద్రప్రసాద్‌ పాత్రకు సంబంధించిన పోస్టర్‌ను ఇండిపెండేన్స్‌ డే నేపథ్యంలో ఇటీవల విడుదల చేసింది చిత్రబృందం.
ఈ సందర్భంగా నిర్మాతలు మాట్లాడుతూ,' పాన్‌ ఇండియా సినిమాగా రూపొందుతున్న పొలిటికల్‌ థ్రిల్లర్‌ ఇది. యూనివర్సల్‌ కథాంశంతో రూపొందుతున్న ఈ చిత్రంలో సీనియర్‌ నటుడు రాజేంద్రప్రసాద్‌ గారు ఎమ్మెల్యే నారాయణస్వామిగా నటిస్తున్నారు. విలువలు, నిజాయితీ కలిగిన జాతీయ నాయకుడుగా ఆయన పాత్ర ఎంతో అద్భుతంగా ఉంటుంది. ఇప్పటి వరకు ఆయన కెరీర్‌లో పోషించనటువంటి విభిన్నమైన పాత్ర ఇది. చిత్రంలో ఈ పాత్ర ఎంతో హైలైట్‌గా ఉంటుంది. మా చిత్రానికి కేజీఎఫ్‌ ఫేమ్‌ రవిబసూర్‌ సంగీతాన్ని అందిస్తున్నారు. ఇటీవల ఆయన నేపథ్య సంగీతంతో విడుదల చేసిన మోషన్‌ పోస్టర్‌కు అనూహ్య స్పందన దక్కింది. చిత్రం కూడా తప్పకుండా అన్ని వర్గాలను ఆకట్టుకుంటుందనే నమ్మకం ఉంది. నేటి సమకాలిన పరిస్థితుల్లో వస్తున్న పొలిటికల్‌ థ్రిల్లర్‌ కావడంతో ఈ సినిమాపై అందరిలోనూ అమితాసక్తి నెలకొని ఉంది. ఈ సినిమా అన్ని వర్గాల ప్రేక్షకుల్ని కచ్చితంగా మెప్పిస్తుంది' అని అన్నారు.
ఈ చిత్రానికి కథ-మాటలు: రాఘవేందర్‌ రెడ్డి, సంగీతం: రవిబసుర్‌, ఆర్ట్‌: కేవీ రమణ, కెమెరా: మురళీకృష్ణ.
