విలక్షణ పాత్రలతో తెలుగు, తమిళ భాషల్లో తనకంటూ ప్రత్యేకమైన మార్కెట్‌తో పాటు ఫ్యాన్‌ ఫాలోయింగ్‌ సంపాదించుకున్న కోలీవుడ్‌ స్టార్‌ హీరో సూర్య. మాస్‌ కమర్షియల్‌ సినిమాలతో అగ్ర దర్శకుడిగా ఎదిగిన శివ కాంబినేషన్‌లో సూర్య ఓ సినిమా చేయబోతున్నారు. ఈ నూతన చిత్రం బుధవారం ప్రారంభమైంది. భిన్నమైన కథలను ఎంచుకుంటూ ప్రత్యేకమైన గుర్తింపును సొంతం చేసుకున్న ప్రతిష్టాత్మక నిర్మాణ సంస్థ యువి క్రియేషన్స్‌, స్టూడియో గ్రీన్‌తో కలిసి ఈ సినిమాను సంయుక్తంగా నిర్మిస్తోంది.
మొదటి నుంచి కమర్షియల్‌ అంశాలతో పాటు వినూత్నమైన కథలను సెలెక్ట్‌ చేసుకుంటూ 'మిర్చి, మహానుభావుడు, భలే భలే మగాడివోరు, భాగమతి' లాంటి ఎన్నో విజయాలతో అగ్ర నిర్మాణ సంస్థగా నిలిచింది యూవీ క్రియేషన్స్‌. 'సాహో', 'రాధే శ్యామ్‌' లాంటి భారీ బడ్జెట్‌ సినిమాలతో బాలీవుడ్‌లో కూడా యూవీ క్రియేషన్స్‌ తన సత్తా చూపించింది. ఈ క్రమంలోనే తమిళ స్టార్‌ హీరో సూర్య, అగ్ర దర్శకుడు శివ కాంబినేషన్‌లో స్టూడియో గ్రీన్‌ ప్రొడక్షన్‌ నెం 25గా యువి క్రియేషన్స్‌తో ఒక భారీ ప్రాజెక్టుకు శ్రీకారం చుట్టారు. ఈ సినిమా షూటింగ్‌ మొదలైంది. చిత్ర యూనిట్‌తో పాటు అతిరథ మహారథుల సమక్షంలో ఈ చిత్ర ఓపెనింగ్‌ వైభవంగా జరిగింది. దేవి శ్రీ ప్రసాద్‌ ఈ సినిమాకు సంగీతమందిస్తున్నారు. త్వరలోనే ఈ చిత్రానికి సంబంధించిన మరిన్ని వివరాలను మేకర్స్‌ ప్రకటించనున్నారు.
'సూర్య, శివ కాంబినేషన్‌లో సినిమా అనగానే అటు కోలీవుడ్‌లోనూ, ఇటు టాలీవుడ్‌లోనూ అందరిలోనూ అమితాసక్తి ఏర్పడింది. దీనిపై ఇప్పటికే భారీ అంచనాలూ ఏర్పడ్డాయి. అయితే ఆ అంచనాలకు దీటుగా సినిమా ఉంటుందని' నిర్మాతలు వంశీ, ప్రమోద్‌ జ్ఞానవేల్‌ రాజా, విక్రమ్‌ తెలిపారు.
