అక్కినేని నాగార్జున, ప్రవీణ్‌ సత్తారు క్రేజీ కాంబినేషన్‌లో వస్తున్న హై వోల్టేజ్‌ యాక్షన్‌ ఎంటర్‌టైనర్‌ 'ది ఘోస్ట్‌'. మునుపెన్నడూ చూడని పాత్రలో పవర్‌ ఫుల్‌ ఇంటర్‌పోల్‌ ఆఫీసర్‌గా నాగార్జున ఈ చిత్రంలో కనిపించబోతున్నారు. ఇప్పటి వరకు విడుదలైన రెండు ప్రోమోలు - ది కిల్లింగ్‌ మెషిన్‌, తమహగనే ప్రేక్షకులని మెస్మరైజ్‌ చేశాయి. ఇప్పుడు ఆ అంచనాలని రెట్టింపు చేస్తూ థియేట్రికల్‌ ట్రైలర్‌ విడుదలైంది. మహేష్‌ బాబు 'ది ఘోస్ట్‌' ట్రైలర్‌ను విడుదల చేసి, టీమ్‌కు శుభాకాంక్షలు తెలిపారు.
ట్రైలర్‌ ప్రధాన పాత్రలను పరిచయం చేయడంతో పాటు కథాంశంపై క్యురియాసిటీని కలిగించింది. ఇంటర్‌పోల్‌ ఆఫీసర్‌ విక్రమ్‌ (నాగార్జున) గ్యాంగ్‌స్టర్ల నుండి ముప్పు ఉన్న తన చెల్లెలు, మేనకోడలను సంరక్షిస్తానని తండ్రికి మాట ఇస్తాడు. కథ, కథనం రెండూ ఆసక్తికరంగా ఉన్నాయి. ఫ్యామిలీ డ్రామా, ఎమోషనల్‌ కనెక్ట్‌తో సినిమా అన్ని వర్గాల ప్రేక్షకులకు ఆకట్టుకునేలా ఉంది. ప్రవీణ్‌ సత్తారు అందరినీ ఆకర్షించే అన్ని అంశాలు ఈ చిత్రంలో ఉండేలా చూసుకున్నారని ట్రైలర్‌ చూస్తే తెలుస్తోంది. కొన్ని థ్రిల్లింగ్‌ సన్నివేశాలతో అతని స్టైలిష్‌ టేకింగ్‌ రోలర్‌కోస్టర్‌ రైడ్‌ను అందిస్తోంది.
నాగార్జున ఏజెంట్‌ విక్రమ్‌గా పవర్‌-ప్యాక్డ్‌ ఫెర్ఫార్మెన్స్‌తో అదరగొట్టారు. యూనిఫామ్‌లో కూడా తనదైన ఫ్యాషన్‌తో అలరించారు. నాగార్జున సబార్డినేట్‌గా కనిపించిన సోనాల్‌ చౌహాన్‌ గ్లామర్‌ విందు పంచారు. నాగ్‌ సోదరిగా గుల్‌ పనాగ్‌ నటిస్తుండగా, మేనకోడలుగా అనిఖా సురేంద్రన్‌ కనిపించింది. ట్రైలర్‌లో ప్రతి బిట్‌ గ్రిప్పింగ్‌, యాక్షన్‌-ప్యాక్డ్‌గా గతంలోలేని విధంగా కనిపిస్తుంది. ఒక సీరియస్‌ మిషన్‌లో ఉన్న నాగార్జున పలికిన డైలాగ్స్‌ కూడా పవర్‌ ఫుల్‌గా ఉన్నాయి. నారాయణ్‌ దాస్‌ నారంగ్‌ ఆశీస్సులతో శ్రీవెంకటేశ్వర సినిమాస్‌ ఎల్‌ఎల్‌పి, నార్త్‌ స్టార్‌ ఎంటర్‌ టైన్‌ మెంట్‌ బ్యానర్స్‌ పై సునీల్‌ నారంగ్‌తో కలసి పుస్కుర్‌ రామ్‌ మోహన్‌ రావు, శరత్‌ మరార్‌ ఈ చిత్రాన్ని భారీగా నిర్మిస్తున్నారు. దసరా కానుకగా అక్టోబర్‌ 5న ఈ చిత్రం ప్రేక్షకుల ముందుకు రానుంది.
