యువ కథానాయకుడు నాని నటిస్తున్న మొదటి పాన్‌ ఇండియా సినిమా 'దసరా'. శ్రీ లక్ష్మీ వెంకటేశ్వర సినిమాస్‌ పతాకంపై నిర్మాత సుధాకర్‌ చెరుకూరి ప్రతిష్టాత్మకంగా నిర్మిస్తున్న భారీ మాస్‌ యాక్షన్‌ ఎంటర్‌టైనర్‌ ఇది. ఈ సినిమాతో శ్రీకాంత్‌ ఓదెల దర్శకుడిగా పరిచయం అవుతున్నారు.
కంఫర్ట్‌ జోన్‌ నుండి బయటికి వచ్చి ఈ చిత్రం కోసం ఫుల్‌లెంత్‌ మాస్‌, యాక్షన్‌-ప్యాక్డ్‌ పాత్రలో కనిపించబోతున్నారు నాని. ఈ పాత్ర కోసం మాస్‌, రగ్గడ్‌ లుక్‌లోకి మేకోవర్‌ అయ్యారు. సినిమా ఎనౌన్స్‌మెంట్‌ వీడియోలో నాని తెలంగాణ యాస అందరినీ ఆశ్చర్యపరిచింది. సినిమా అంతా ఆయన మాస్‌ డైలాగులు పలకడం ఆయన అభిమానులకు ఒక పండగే. 'స్పార్క్‌ ఆఫ్‌ దసరా' గ్లింప్స్‌కి కూడా అద్భుతమైన స్పందన వచ్చింది.
తాజాగా నిర్మాతలు బిగ్‌ అప్‌డేట్‌ ఇచ్చారు. 30 మార్చి, 2023న ప్రపంచవ్యాప్తంగా థియేటర్స్‌లో ఈ సినిమా విడుదల కానుంది. 30 మార్చి, 2023 శ్రీరామ నవమి. ఆ తర్వాత నాలుగు రోజుల లాంగ్‌ వీకెండ్‌ ఉంటుంది. అలాగే వేసవి సెలవులు కూడా సినిమాకి కలిసిరానున్నాయి. అన్ని భాషల్లో సినిమా విడుదలకు ఇది సరైన సమయమని నిర్మాతలు భావించారు.
రిలీజ్‌ డేట్‌ ఎనౌన్స్‌మెంట్‌ పోస్టర్‌లో నాని పక్కా మాస్‌ లుక్‌లో కనిపిస్తున్నారు. బ్యాక్‌గ్రౌండ్‌లో ఒకప్పటి పాపులర్‌ స్టార్‌ నటి సిల్క్‌స్మిత తన గోళ్లు కొరికే సిగేచర్‌ ఫోటోని కూడా చూడొచ్చు.
ఈ సినిమా చిత్రీకరణ హైదరాబాద్‌లో బుధవారం నుంచి తిరిగి ప్రారంభమైంది. ప్రధాన తారాగణం అంతా చిత్రీకరణలో పాల్గొంటున్నారు. నాని సరసన నేషనల్‌ అవార్డ్‌ విన్నర్‌ కీర్తి సురేష్‌ కథానాయికగా నటిస్తోంది.
పెద్దపల్లి జిల్లా, గోదావరిఖని (తెలంగాణ)లోని సింగరేణి బొగ్గు గనులలో ఉన్న ఒక గ్రామం నేపథ్యంలో ఈ సినిమా కథ సాగుతోంది. సముద్రఖని, సాయి కుమార్‌, జరీనా వహాబ్‌ కీలక పాత్రలలో కనిపించనున్న ఈ చిత్రానికి సత్యన్‌ సూర్యన్‌ సినిమాటోగ్రాఫర్‌గా, సంతోష్‌ నారాయణన్‌ సంగీత దర్శకుడిగా పని చేస్తున్నారు. అలాగే ఈ చిత్రానికి ఎడిటర్‌గా నవీన్‌ నూలి, ప్రొడక్షన్‌ డిజైనర్‌గా అవినాష్‌ కొల్లా, ఎగ్జిక్యూటివ్‌ నిర్మాతగా విజరు చాగంటి వ్యవహరిస్తున్నారు.
ఈ చిత్రం తెలుగు, తమిళం, కన్నడ, మలయాళం, హిందీ భాషల్లో శ్రీరామనవమి కానుకగా వచ్చే ఏడాది మార్చి 30న విడుదల కానుంది.
