నందమూరి బాలకృష్ణ, దర్శకుడు గోపీచంద్‌ మలినేని క్రేజీ కాంబినేషన్‌లో తెరకెక్కుతున్న మాస్‌ యాక్షన్‌ ఎంటర్‌టైనర్‌ ఎన్‌బికె 107 షూటింగ్‌ తిరిగి ప్రారంభమైంది. తాజాగా కీలకమైన షూటింగ్‌ షెడ్యూల్‌ కోసం చిత్ర యూనిట్‌ టర్కీలోని ఇస్తాంబుల్‌ వెళ్ళింది. అక్కడ సినిమాలోని ప్రముఖ తారాగణంతో కీలక భాగాన్ని చిత్రీకరించనున్నారు.
దర్శకుడు గోపీచంద్‌ మలినేని షూటింగ్‌ లొకేషన్‌ నుండి బాలకృష్ణ, శ్రుతి హాసన్‌లతో కలిసి దిగిన సెల్ఫీని పోస్ట్‌ చేశారు. ఈ సినిమా షూటింగ్‌ ఎగ్జైట్‌మెంట్‌ ఈ ముగ్గురిలోనూ కనిపిస్తోంది. టాకీపార్ట్‌ కాకుండా యాక్షన్‌ ఎపిసోడ్స్‌ కూడా ఈ షెడ్యూల్‌లో షూట్‌ చేయనున్నట్టు మేకర్స్‌తెలిపారు.
మేకర్స్‌ ఇటివలే బాలకష్ణ పుట్టినరోజున రెండు బ్యాక్‌-టు-బ్యాక్‌ ట్రీట్‌లను అందించారు. ఫస్ట్‌ హంట్‌ వీడియో, ఆ తర్వాత మాస్‌ పోస్టర్‌ని విడుదల చేశారు. ఈ రెండింటికి అన్ని వర్గాల ప్రేక్షకుల నుంచి అద్భుతమైన రెస్పాన్స్‌ లభించింది. ఈ చిత్రంలో దునియా విజరు, వరలక్ష్మి శరత్‌కుమార్‌లు కీలక పాత్రలు పోషిస్తున్నారు. తమన్‌ సంగీతం అందిస్తుండగా, రిషి పంజాబీ సినిమాటోగ్రాఫర్‌గా పని చేస్తున్నారు.
'బాలకృష్ణ, గోపీచంద్‌ మలినేని కాంబినేషన్‌లో వస్తున్న ఈ సినిమాపై ఇప్పటికే అందరిలోనూ భారీ అంచనాలు ఉన్నాయి. ఈ సినిమాలో బాలకృష్ణ పాత్రను దర్శకుడు గోపీచంద్‌ వినూత్నంగా చూపించబోతున్నారనే విషయం ఇప్పటికే పోస్టర్‌, ఫస్ట్‌ హంట్‌ ద్వారా చెప్పకనే చెప్పారు. ఎన్నో ప్రత్యేకతలతో రూపొందుతున్న ఈ సినిమాకి సంబంధించి మరిన్ని విశేషాలను మేకర్స్‌ త్వరలోనే తెలియజేయనున్నారు' అని చిత్ర బృందం తెలిపింది.
మైత్రీ మూవీ మేకర్స్‌ పతాకంపై నిర్మాతలు నవీన్‌ యెర్నేని, వై రవిశంకర్‌ ఈ చిత్రాన్ని భారీగా నిర్మిస్తున్నారు. సాయి మాధవ్‌ బుర్రా డైలాగ్స్‌ అందించగా, నవీన్‌ నూలి ఎడిటర్‌గా, ఎఎస్‌ ప్రకాష్‌ ప్రొడక్షన్‌ డిజైనర్‌గా పని చేస్తున్నారు. చందు రావిపాటి ఎగ్జిక్యూటివ్‌ ప్రొడ్యూసర్‌గా వ్యవహరిస్తున్న ఈ చిత్రానికి ఫైట్‌ మాస్టర్స్‌గా రామ్‌-లక్ష్మణ్‌ పని చేస్తున్నారు. ఈ చిత్రానికి కథ, స్క్రీన్‌ప్లే , దర్శకత్వం: గోపీచంద్‌ మలినేని, నిర్మాతలు: నవీన్‌ యెర్నేని, వై రవిశంకర్‌, డివోపీ: రిషి పంజాబీ, సిఈవో: చిరంజీవి (చెర్రీ), ఎగ్జిక్యూటివ్‌ ప్రొడ్యూసర్‌: చందు రావిపాటి, లైన్‌ ప్రొడ్యూసర్‌: బాల సుబ్రమణ్యం కెవివి.
