'నేను, హరనాథ్‌ కలిసి పలు సినిమాల్లో నటించాం. ఆయన నిజమైన అందాల నటుడు. అలాగే మంచి మనసున్న వ్యక్తి కూడా. అంతేకాకుండా నేను హీరోగా నటించిన 'మా ఇంటి దేవత' చిత్రాన్ని హరినాథ్‌ నిర్మించారు' అని నటశేఖర కృష్ణ అన్నారు. హీరో హరనాథ్‌ జీవిత చరిత్ర 'అందాల నటుడు'ని ఆయన జయంతి సందర్భంగా శుక్రవారం కష్ణ ఆయన నివాసంలో విడుదల చేశారు. ఈ కార్యక్రమంలో హరనాథ్‌ కుమార్తె జి.పద్మజ, అల్లుడు జివిజి రాజు (చిత్ర నిర్మాత-'తొలి ప్రేమ', 'గోదావరి' ), మనవలు శ్రీనాథ్‌ రాజు, శ్రీరామ్‌ రాజు తదితరులు పాల్గొన్నారు. హరనాథ్‌ కుమారుడు బి.శ్రీనివాస్‌ రాజు (చిత్ర నిర్మాత- 'గోకులంలో సీత','రాఘవేంద్ర'), కోడలు మాధురి, మనవరాళ్లు శ్రీలేఖ, శ్రీహరి చెన్నైలో నివాసం ఉంటున్నారు.
హరనాథ్‌ జీవిత చరిత్రను 'అందాల నటుడు' పేరుతో ఆయన వీరాభిమాని, ఆరాధకుడు డాక్టర్‌ కంపల్లి రవిచంద్రన్‌ రచించారు. అరుదైన ఫోటోలు, ఎవరికీ అంతగా తెలియని ఆసక్తికరమైన విషయాలతో ఈ పుస్తకాన్ని అందంగా తీర్చిదిద్దారు. డాక్టర్‌ కంపల్లి రవిచంద్రన్‌ ఆంధ్రప్రదేశ్‌ రాష్ట్రం మరియు ఇతర సంస్థల నుండి అనేక అవార్డులు అందుకున్నారు.
బ్లాక్‌ అండ్‌ వైట్‌ సినిమా కాలంలో అప్పటి అమ్మాయిల కలల రాకుమారుడిగా పేరు తెచ్చుకున్న తెలుగు హీరో బుద్ధరాజు హరనాథ్‌ రాజు. 1936లో సెప్టెంబర్‌ 2న తూర్పుగోదావరి జిల్లా పిఠాపురం మండలంలోని రాపర్తి గ్రామంలో ఆయన జన్మించారు. చెన్నైలో పాఠశాల విద్యను అభ్యసించిన ఆయన కాకినాడలోని పి.ఆర్‌ కళాశాలలో బి.ఏ.పూర్తి చేశారు. ఆయన తన కెరీర్‌లో తెలుగు, తమిళం, కన్నడ, హిందీ, బెంగాలీ భాషల్లో కలిపి 167 సినిమాల్లో నటించారు. హరనాథ్‌ 1989, నవంబర్‌ 1న తుదిశ్వాస విడిచారు.
నటరత్న ఎన్‌.టి.రామారావు దర్శకత్వం వహించిన 'సీతారామ కళ్యాణం' చిత్రంలోని 'శ్రీ సీతారాముల కళ్యాణము చూడము రారండి' పాటలో శ్రీరామునిగా హరనాథ్‌ రూపం తెలుగు ప్రేక్షకుల జ్ఞాపకాలలో చిరస్థాయిగా నిలిచిపోయిందనటంలో ఏ మాత్రం సందేహం లేదు.
