శివ కుమార్‌, హుమరు చంద్‌, అక్షత శ్రీధర్‌, అర్చన హీరో, హీరోయిన్లుగా మిథున ఎంటర్‌టైన్‌మెట్స్‌ ప్రై.లి, సైన్స్‌ స్టూడియోస్‌ ప్రొడక్షన్స్‌ బ్యానర్‌పై రూపొందుతున్న చిత్రం 'ఆకాశవాణి విశాఖపట్టణ కేంద్రం'.
జబర్దస్త్‌ ఫేం సతీష్‌ బత్తుల ఈ చిత్రంతో దర్శకుడిగా పరిచయం అవుతున్నారు. ఎం.ఎం.అర్జున్ నిర్మాత. థ్రిల్లింగ్‌ లవ్‌ ఎంటర్‌టైనర్‌గా తెరకెక్కుతున్న ఈ చిత్రాన్ని తెలుగు, తమిళ, కన్నడ, మలయాళ, హిందీ భాషల్లో పాన్‌ ఇండియా మూవీగా విడుదల చేస్తున్నారు. కార్తీక్‌ కొడకండ్ల సంగీతం అందించిన ఈ సినిమా నుంచి రెండవ సాంగ్‌ను ఇటీవల చిత్ర యూనిట్‌ విడుదల చేసింది.
ఈ సందర్భంగా నిర్మాత ఎం.ఎం.అర్జున్ మాట్లాడుతూ, 'సతీష్‌ కథ చెప్పగానే బాగా నచ్చింది. ఆయన సినిమాను నెరేట్‌ చేసిన దాని కంటే చక్కగా తెరకెక్కించారు. ఓ మంచి సినిమాను రూపొందించడంలో నిర్మాతగా నా వంతు బాధ్యతను సమర్ధవంతంగా నిర్వర్తించాను. హీరో, హీరోయిన్లు శివ కుమార్‌, హుమరు చంద్‌, అక్షత శ్రీధర్‌, అర్చన చక్కగా నటించారు. యూనివర్సల్‌ పాయింట్‌ కావటంతో సినిమాను పాన్‌ ఇండియా మూవీగా తెలుగు, తమిళ, కన్నడ, మలయాళ, హిందీ భాషల్లో విడుదల చేస్తున్నాం. కార్తీక్‌ కొడకండ్ల సంగీతం అందించారు. గతంలో మా సినిమా నుంచి విడుదలైన తొలి లిరికల్‌ సాంగ్‌కి మంచి స్పందన వచ్చింది. తాజాగా సెకెండ్‌ లిరికల్‌ సాంగ్‌ను రిలీజ్‌ చేశాం. ఈ సాంగ్‌ని ప్రముఖ గాయకుడు, రచయిత పెంచలదాస్‌ రాసి, ఆలపించారు. గతంలో ఆయన పాడిన 'అరవింద సమేత', 'కష్ణార్జున యుద్ధం' చిత్రాల సాంగ్స్‌కి ఎంత మంచి పేరు వచ్చిందో, ఈ సాంగ్‌కి అంతే స్థాయిలో పేరు రావడం ఖాయం. త్వరలోనే ఈ చిత్ర రిలీజ్‌ డేట్‌ను ప్రకటిస్తాం' అని అన్నారు.
