'రాజా వారు రాణి గారు', 'ఎస్‌ఆర్‌ కల్యాణ మండపం','సమ్మతమే' చిత్రాలతో అలరించిన కిరణ్‌ అబ్బవరం హీరోగా తాజాగా నటిస్తున్న చిత్రం 'నేను మీకు బాగా కావాల్సినవాడిని'. ఈ సినిమా అన్ని కార్యక్రమాలను పూర్తి చేసుకుని విడుదలకు సిద్దమవుతోంది. కోడి రామకృష్ణ పెద్ద కుమార్తె కోడి దివ్య దీప్తి నిర్మిస్తున్న ఈ సినిమాకు 'ఎస్‌ఆర్‌ కల్యాణమండపం' డైరెక్టర్‌ శ్రీధర్‌ గాదే దర్శకత్వం వహిస్తున్నారు.
ఈ మూవీకి మెలోడి బ్రహ్మ మణిశర్మ సంగీతం అందిస్తున్నారు.ఇప్పటికే విడుదలైన ఈ సినిమా పాటలకు మంచి రెస్పాన్స్‌ వచ్చింది. తాజాగా ఈ చిత్రం నుండి 'చాలా బాగుందే' అనే లిరికల్‌ సాంగ్‌ను విడుదల చేసింది చిత్రబృందం. ఈ పాట వింటుంటే ఇదొక అద్భుతమైన మెలోడీ సాంగ్‌ అని అర్థమవుతోంది. అలానే ఈ చిత్ర ట్రైలర్‌కు కూడా మంచి స్పందన లభించింది. కిరణ్‌ ఈ సినిమాలో క్యాబ్‌ డ్రైవర్‌గా కనిపించనున్నాడు. ప్రముఖ దర్శకుడు, నటుడు ఎస్‌.వి. కృష్ణారెడ్డి ఈ సినిమాలో కీలక పాత్ర పోషిస్తున్నారు. కిరణ్‌ అబ్బవరంతో పాటు కొరియోగ్రాఫర్‌ బాబా భాస్కర్‌ కూడా ప్రేక్షకుల్ని అలరించబోతున్నారు. పక్కా ఫ్యామిలీ ఎంటర్టైనర్గా తెరకెక్కిన ఈ చిత్రంలో కిరణ్‌కు జోడీగా సంజనా ఆనంద్‌ హీరోయిన్‌గా నటించింది. కమర్షియల్‌ ఫ్యామిలీ ఎంటర్టైనర్గా వస్తున్న ఈ సినిమా ఈ నెల 16న ప్రేక్షకుల ముందుకు రానుంది. 'మా చిత్రానికి సంబంధించి ఇప్పటివరకు విడుదల చేసిన ప్రమోషనల్‌ కంటెంట్‌ ప్రేక్షకుల్ని విశేషంగా అలరించింది. దీంతో మా సినిమాపై అందరిలోనూ అంచనాలు పెరిగాయి. అలాగే సినిమాని ఎప్పుడెప్పుడు చూడాలా అనే ఆసక్తితో అందరూ ఎదురు చూడటం ఎంతో ఆనందంగా ఉంది. ఈనెల 16న మా చిత్రాన్ని భారీ స్థాయిలో ప్రపంచ వ్యాప్తంగా థియేటర్లలో విడుదల చేసేందుకు రంగం సిద్ధం చేశాం' అని నిర్మాత కోడి దివ్య దీప్తి తెలిపారు.
