వినోదంతో కూడిన వైవిధ్యమైన చిత్రాలు రూపొందిస్తూ, విలక్షణమైన కథాంశాలని ఎంచుకుంటూ తనకంటూ ఒక మార్క్‌ని సంపాదించుకున్నారు దర్శకుడు మేర్లపాక గాంధీ. ప్రస్తుతం ఆయన హీరో సంతోష్‌ శోభన్‌తో ఒక సినిమా చేస్తున్నారు. సంతోష్‌ కథానాయకుడిగా నటించిన సూపర్‌ హిట్‌ 'ఏక్‌ మినీ కథ'కు మేర్లపాక గాంధీ కథ, స్క్రీన్‌ ప్లే అందించిన విషయం తెలిసిందే. వారి క్రేజీ కలయికలో వస్తున్న రెండో చిత్రమిది. ప్రేక్షకులను మెప్పించే యూనిక్‌ కాన్సెప్ట్‌తో రూపొందుతున్న ఈ లవ్‌ అండ్‌ ఎంటర్‌టైనర్‌లో సంతోష్‌ శోభన్‌కి జోడిగా 'జాతి రత్నాలు' ఫేమ్‌ ఫరియా అబ్దుల్లా కథానాయికగా నటిస్తోంది.
బ్లాక్‌ బస్టర్‌ హిట్‌ 'శ్యామ్‌ సింగరారు'ని అందించిన వెంకట్‌ బోయనపల్లికి చెందిన నిహారిక ఎంటర్‌టైన్‌మెంట్స్‌తో కలిసి ఆముక్త క్రియేషన్స్‌ ఈ చిత్రాన్ని నిర్మిస్తోంది. ఈ సినిమా షూటింగ్‌ చివరి దశలో ఉంది.
తాజాగా ఫస్ట్‌లుక్‌ పోస్టర్‌ను విడుదల చేయడంతో పాటు, ఈ సినిమా టైటిల్‌ను కూడా ప్రకటించారు మేకర్స్‌. ఈ చిత్రానికి లైక్‌ షేర్‌ అండ్‌ సబ్‌స్క్రైబ్‌ అనే క్రేజీ టైటిల్‌ పెట్టారు. ఇవి యూట్యూబ్‌లో వీడియో కంటెంట్‌ను ప్రచారం చేయడానికి ఉపయోగించే పాపులర్‌ పదాలు. ప్రతి పదాన్ని సూచించే చిహ్నాలతో టైటిల్‌ లోగో చాలా ఆసక్తికరంగా కనిపించడం విశేషం.
సంతోష్‌ శోభన్‌, ఫరియా అబ్దుల్లా, నెల్లూరు సుదర్శన్‌ అడవిలో, టాప్‌ యాంగిల్‌లో విచిత్రమైన ఎక్స్‌ప్రెషన్స్‌ ఇస్తూ చూస్తున్న ఫస్ట్‌ లుక్‌ పోస్టర్‌ చాలా ఇంట్రెస్టింగ్‌గా ఉంది. టైటిల్‌, ఫస్ట్‌లుక్‌ పోస్టర్‌ చూస్తుంటే సినిమా కథ చాలా విలక్షణంగా ఉండబోతోందని తెలుస్తోంది.
సంతోష్‌ శోభన్‌, ఫరియా అబ్దుల్లా, నెల్లూరు సుదర్శన్‌ ప్రధాన తారాగణంగా నటిస్తున్న ఈ చిత్రానికి రచయిత, దర్శకత్వం: మేర్లపాక గాంధీ, నిర్మాత: వెంకట్‌ బోయనపల్లి, సంగీతం: ప్రవీణ్‌ లక్కరాజు, డీవోపీ: వసంత్‌, ప్రొడక్షన్‌ డిజైనర్‌: అవినాష్‌ కొల్లా, ఎగ్జిక్యూటివ్‌ ప్రొడ్యూసర్‌: వెంకటరత్నం (వెంకట్‌).
