ఏ సినిమాకైనా మొదటి రోజు మొదటి ఆట ఎంతో ముఖ్యం. అయితే ఫస్ట్‌ డే ఫస్ట్‌ షోను ఉచితంగా వేస్తున్నారంటే.. సినిమా మీద ఎంత నమ్మకం ఉండాలి?, ఆ నమ్మకంతోనే 'పగ పగ పగ' సినిమాను మేకర్స్‌ ఉచితంగా ప్రదర్శిస్తున్నారు. ఇందులో ప్రముఖ సంగీత దర్శకుడు కోటి మొదటి సారిగా ఓ విలక్షణ పాత్రలో కనిపించబోతున్నారు.
సుంకర బ్రదర్స్‌ వారి సమర్పణలో అభిలాష్‌ సుంకర, దీపిక ఆరాధ్య హీరో, హీరోయిన్లుగా వినోదాత్మకంగా కొనసాగే క్రైమ్‌ యాక్షన్‌ థ్రిల్లర్‌గా ఈ చిత్రాన్ని తెరకెక్కించారు. డైరెక్టర్‌ రవి శ్రీ దుర్గా ప్రసాద్‌ ఈ చిత్రాన్ని వినూత్నంగా రూపొందించారు. నిర్మాత సత్య నారాయణ సుంకర ఈ చిత్రాన్ని భారీ ఎత్తున నిర్మించారు.
ప్రమోషన్స్‌ కార్యక్రమంలో భాగంగా ఇప్పటికే విడుదల చేసిన సినిమా పోస్టర్‌, మూవీ మోషన్‌ పోస్టర్‌, కోటి నటించిన పాత్రకు సంబంధించిన ఫస్ట్‌ గ్లింప్స్‌కు మంచి స్పందన వచ్చింది. అయితే ఈ చిత్రం మీద ఉన్న నమ్మకంతో నిర్మాతలు ఓ సాహసోపేతమైన నిర్ణయాన్ని తీసుకున్నారు. ఈ చిత్రం ఈనెల 22న ప్రేక్షకుల ముందుకు రాబోతోంది. అయితే ఈ మూవీ ఫస్ట్‌ డే ఫస్ట్‌ షోని అందరికీ ఫ్రీగా చూపించాలని నిర్ణయించుకున్నారు. ఈ డేరింగ్‌ స్టెప్‌తో ఇండిస్టీలోని కొన్ని వర్గాలు ఆశ్చర్యపోతున్నాయి. అయినా కూడా సినిమా ఫలితంపై ఉన్న నమ్మకంతోనే ఇలాంటి నిర్ణయం తీసుకున్నామని నిర్మాతలు చెప్పటం విశేషం. బెనర్జీ, జీవీకే నాయుడు, కరాటే కళ్యాణి, భరణి శంకర్‌, రాయల్‌ హరిశ్చంద్ర, సంపత్‌, జబర్దస్త్‌ వాసు ముఖ్య పాత్రల్లో నటిస్తున్న ఈ చిత్రానికి సంగీతం కోటి అందించారు. ఈ మూవీకి సినిమాటోగ్రాఫర్‌ :నవీన్‌ కుమార్‌ చల్లా, ఎడిటర్‌: పాపారావు, ఫైట్‌ మాస్టర్‌ : రామ్‌ సుంకర.
