అక్కినేని నాగ చైతన్య, వెంకట్‌ ప్రభు వంటి క్రేజీ కాంబినేషన్‌లో సినిమా ప్రకటన వెలువడినప్పటి నుంచే క్యూరియాసిటీని పెంచింది. ఈ చిత్రానికి ఎన్‌సి 22 అనే వర్కింగ్‌ టైటిల్‌ పెట్టారు. నాగచైతన్య తొలి తెలుగు-తమిళ ద్విభాషా చిత్రమిది కావడం విశేషం. అలాగే డైరెక్టర్‌ వెంకట్‌ ప్రభుకి కూడా ఇది తొలి తెలుగు సినిమా కూడా మరో విశేషం.
ఈ ప్రతిష్టాత్మక ప్రాజెక్ట్‌ ఇటీవల పూజా కార్యక్రమంతో ప్రారంభమైంది. ఈ చిత్రంలో నాగ చైతన్యకు జోడీగా కతి శెట్టి నటిస్తోంది. ఈ చిత్రానికి సంగీత దర్శకులైన తండ్రీ కొడుకులు మాస్ట్రో ఇళయరాజా, యువన్‌ శంకర్‌ రాజా సంయుక్తంగా సంగీతం అందించడం ఈ చిత్రానికి ఉన్న మరో ప్రత్యేకత. అలాగే వీళ్ళిద్దరూ కలసి చేస్తున్న మొదటి సినిమా కావడంతో ఈ కాంబినేషన్‌లో చార్ట్‌బస్టర్‌ ఆల్బమ్‌ ఖాయమనే దీమాతో మేకర్స్‌ ఉన్నారు.
నాగ చైతన్య అభిమానులు, ప్రేక్షకులు ఈ సినిమా అప్డేట్ కోసం ఆసక్తిగా ఎదురుచూస్తున్నారు. ఈ నేపథ్యంలో దీనికి సంబంధించి అదిరిపోయే అప్డేట్ వచ్చింది. నేడు (బుధవారం) రామోజీ ఫిల్మ్ సిటీలో ఎన్‌సి 22 చిత్రీకరణ ప్రారంభం కానుంది.
'అక్కినేని నాగేశ్వరరావు గారి దివ్య ఆశీస్సులతో.. నాగ చైతన్య, వెంకట్‌ ప్రభు కాంబినేషన్‌లో మా ప్రతిష్టాత్మక ప్రాజెక్ట్‌ గురించి అద్భుతమైన అప్‌డేట్‌ను ప్రకటిస్తున్నాం. నేటి (బుధవారం) నుండి ఎన్‌సి 22 యాక్షన్‌ బిగిన్స్‌' అని ప్రకటించారు మేకర్స్‌. ఈ సందర్భంగా నాగ చైతన్యకి సంబంధించిన ఓ ఆసక్తికర పోస్టర్‌ను కూడా రిలీజ్‌ చేశారు. ఇది అందరినీ సర్‌ ప్రైజ్‌ చేయడంతో పాటు మరింత ఆసక్తిని పెంచింది.
నాగ చైతన్య అప్పిరియన్స్‌, లుక్‌ రివీల్‌ చేయకుండా పోస్టర్‌ డిజైన్‌ చేశారు. పోస్టర్‌లో నాగ చైతన్యపై కొన్ని టార్గెట్‌లు ఉండటం గమనించవచ్చు. పోస్టర్‌ రెడ్‌ అండ్‌ బ్లాక్‌ కలర్స్‌లో పవర్‌ ఫుల్‌ వైబ్స్‌ని కలిగి ఉంది.
ఇంకా టైటిల్‌ నిర్ణయించని ఈ చిత్రాన్ని శ్రీనివాస సిల్వర్‌ స్క్రీన్‌పై శ్రీనివాస చిట్టూరి నిర్మిస్తున్నారు. ఈ ప్రతిష్టాత్మక ప్రాజెక్ట్‌ని పవన్‌కుమార్‌ సమర్పిస్తున్నారు. ప్రముఖ నటీనటులు, సాంకేతిక నిపుణులు ఈ చిత్రానికి పని చేస్తున్నారు.
నాగ చైతన్య, కృతి శెట్టి జంటగా నటిస్తున్న ఈ చిత్రానికి కథ, స్క్రీన్‌ప్లే, దర్శకత్వం: వెంకట్‌ ప్రభు, నిర్మాత: శ్రీనివాస చిట్టూరి, సమర్పణ: పవన్‌ కుమార్‌, సంగీతం: ఇళయరాజా, యువన్‌ శంకర్‌ రాజా, డైలాగ్స్‌: అబ్బూరి రవి.
