అక్కినేని నాగార్జున, ప్రవీణ్‌ సత్తారు కాంబినేషన్‌లో రూపొందుతున్న యాక్షన్‌ థ్రిల్లర్‌ 'ది ఘోస్ట్‌'. సోనాల్‌ చౌహాన్‌ కథానాయిక. నారాయణ్‌ దాస్‌ నారంగ్‌ ఆశీస్సులతో శ్రీవెంకటేశ్వర సినిమాస్‌ ఎల్‌ఎల్‌పి, నార్త్‌ స్టార్‌ ఎంటర్‌ టైన్‌ మెంట్‌ బ్యానర్స్‌ పై సునీల్‌ నారంగ్‌తో కలిసి పుస్కుర్‌ రామ్‌ మోహన్‌ రావు, శరత్‌ మరార్‌ ఈ చిత్రాన్ని నిర్మిస్తున్నారు.
దసరా కానుకగా ఈ చిత్రం అక్టోబర్‌ 5న ప్రపంచ వ్యాప్తంగా థియేటర్లలోకి రానున్న నేపథ్యంలో హీరోయిన్‌ సోనాల్‌ చౌహాన్‌ మీడియాతో చిత్ర విశేషాలను షేర్‌ చేసుకున్నారు.
''ఎఫ్‌3'లో క్యామియో రోల్‌ చేశాను. ఆ తర్వాత ఈ సినిమాలో నటించాను. నాకెప్పుడూ యాక్షన్‌ సినిమాల్లో నటించాలని ఉండేది. ప్రవీణ్‌ సత్తారు క్రియేటివ్‌ డైరెక్టర్‌. ఆయన ఈ కథ చెప్పినపుడు చాలా థ్రిల్‌ అనిపించింది. నాగ్‌ సార్‌ ఈ ప్రాజెక్ట్‌లో ఉన్నారని తెలిసి చాలా ఎగ్జైట్‌ అయ్యా. ఈ ప్రాజెక్ట్‌లో భాగం కావడం అదృష్టంగా భావిస్తున్నా. ఇందులో ఇంటర్ పోల్‌ ఆఫీసర్‌గా కనిపిస్తా. అయితే శారీరకంగా, మానసికంగా చాలా సవాల్‌తో కూడుకున్న పాత్ర చేశాను. ఇలాంటి పాత్ర చేయడం నా కెరీర్‌లో ఇదే మొదటిసారి. ఈ పాత్ర కోసం ప్రత్యేకంగా శిక్షణ తీసుకున్నాను. యాక్షన్‌తో పాటు ఎంఎంఎ శిక్షణ పొందాను. మా నాన్న పోలీస్‌ ఆఫీసర్‌ కావడంతో గన్స్‌తో నాకు పరిచయం ఉంది (నవ్వుతూ). అయితే ఈ సినిమా కోసం ఏకే 47 లాంటి పెద్ద వెపన్స్‌ని పట్టుకోవడం, లోడ్‌ చేయడం, వాటిని హ్యాండిల్‌ చేయడంలో ప్రత్యేక శిక్షణ తీసుకున్నాను. అలాగే డైలాగ్‌ డిక్షన్‌ విషయంలో కూడా ప్రత్యేక శ్రద్ధపెట్టాను. ఒక నటిగా చాలా తృప్తిని ఇచ్చిన చిత్రమిది. చిత్రీకరణని చాలా ఎంజారు చేశాను. ఒక డ్రీమ్‌ టీంతో కలిసి పని చేయడం గొప్ప ఆనందం ఇచ్చింది. నిజంగా ఇందులో నా పాత్ర ఒక డ్రీమ్‌ రోల్‌. ఈ సినిమా కోసం చాలా హార్డ్‌ వర్క్‌ చేశాను. సినిమా చూసిన తర్వాత కేవలం గ్లామరస్‌ పాత్రల్లోనే కాకుండా వైవిధ్యమైన పాత్రలు చేయగలనే నమ్మకం అందరికీ కుదురుతుందని భావిస్తున్నాను. నాగ్‌ సార్‌తో పని చేయడం ఒక డ్రీమ్‌. ఆ కల ఈ సినిమాతో తీరింది' అని సోనాల్‌ చౌహాన్‌ చెప్పారు.
