తెలుగు సినిమా పుట్టిన ఆరేళ్లకు తొలి తెలుగు సినిమా పత్రిక 'తెలుగు టాకీ' వచ్చింది. ఇక అప్పటి నుంచి తెలుగులో ఎన్ని పత్రికలు వచ్చాయి?, ఏ ఏ జర్నలిస్టు చిత్ర పరిశ్రమ అభివృద్ధికి కృషి చేశారు? అనే వివరాల గురించి మూడేళ్లు కృషి చేసి సీనియర్‌ ఫిల్మ్ జర్నలిస్ట్‌ వినాయకరావు అందిస్తున్న పుస్తకం 'తెలుగు సినీ పాత్రికేయ చరిత్ర'.
ఈ పుస్తకం ఫస్ట్‌ లుక్‌ పోస్టర్‌ను కృష్ణ, బ్రహ్మానందం విడి, విడిగా ఆవిష్కరించారు. ఈ సందర్భంగా హీరో కృష్ణ మాట్లాడుతూ, 'వినాయకరావు ఇంతవరకూ ఎన్టీఆర్‌, దాసరి, రామానాయుడు గురించి పుస్తకాలు రాశారు. నా సినీ జీవిత విశేషాలు, నటించిన చిత్రాల వివరాలతో 'దేవుడు లాంటి మనిషి' పుస్తకం రాశారు. 500 పేజీలతో వెలువడిన ఆ పుస్తకం అందరినీ అలరించింది. ఇప్పుడు 'సినీ పాత్రికేయుల చరిత్ర'కు అక్షర రూపం ఇస్తున్నారు. అయన ప్రయత్నం విజయవంతమై, మంచి పేరు తెచ్చి పెట్టాలని ఆశిస్తున్నాను' అని అన్నారు.
'84 ఏళ్ల సుదీర్ఘమైన పాత్రికేయ చరిత్రని అక్షరాల్లో పెట్టాలని అనుకోవడం సాహసమే. కానీ ఎంతో మంది జీవిత చరిత్రలు రాసిన వినాయకరావుకి ఇది సాధ్యమే అవుతుంది. ఈ పుస్తకం ఆయనకు మరింత గుర్తింపు తెచ్చి పెట్టాలని కోరుకుంటున్నాను' అని బ్రహ్మానందం చెప్పారు.వినాయకరావు మాట్లాడుతూ, 'పాత్రికేయుల చరిత్రను పుస్తక రూపంలో తీసుకురావాలన్నది నా 15 ఏళ్ల కల. ఇప్పటికీ అది కార్యరూపం దాలుస్తోంది. పుస్తకం రెడీ అయింది. వచ్చే నెలలో విడుదల చేస్తాం' అని తెలిపారు.
