'స్వయంవరం, నువ్వే కావాలి, నువ్వు నాకు నచ్చావ్‌, మన్మధుడు, మల్లీశ్వరి' వంటి తదితర చిత్రాల దర్శకుడు కె.విజరు భాస్కర్‌ కొంత విరామం తర్వాత మెగాఫోన్‌ పడుతున్నారు. ఆయన దర్శకత్వంలో ఎస్‌ఆర్కే బ్యానర్‌ పై పారిశ్రామికవేత్త గుంటూరు రామకృష్ణ ఈ చిత్రాన్ని నిర్మిస్తున్నారు. వెంకట శ్రీనివాస్‌ బొగ్గరం సమర్పిస్తున్నారు. శ్రీ కమల్‌ హీరోగా పరిచయం అవుతున్న ఈ చిత్రంలో శివాని రాజశేఖర్‌ కథానాయిక..విజయ భాస్కర్‌ దర్శకత్వంలో వస్తున్న 13వ చిత్రమిది. ఈ చిత్రానికి 'జిలేబి' అనే ఆసక్తికర టైటిల్‌ని ఖరారు చేశారు. విజయదశమిని పురస్కరించుకుని ఈ చిత్ర ప్రారంభోత్సవం చలన చిత్ర ప్రముఖుల సమక్షంలో గ్రాండ్‌గా జరిగింది. నిర్మాత స్రవంతి రవి కిషోర్‌ స్క్రిప్ట్‌ అందించగా, హీరో రాజశేఖర్‌ కెమెరా స్విచ్చాన్‌ చేశారు. దర్శకుడు త్రివిక్రమ్‌ శ్రీనివాస్‌ క్లాప్‌ ఇవ్వగా, తొలి సన్నివేశానికి బి.గోపాల్‌ దర్శకత్వం వహించారు.
ఈ సందర్భంగా దర్శకుడు కె. విజయ భాస్కర్‌ మాట్లాడుతూ, 'చాలా విరామం తర్వాత మళ్ళీ దర్శకత్వం చేయడం ఆనందంగా ఉంది. రామకష్ణ, శ్రీనివాస్‌ గారితో కలిసి చేస్తున్న ఈ సినిమాకి సంబంధించి పూర్తి వివరాలు త్వరలోనే తెలియజేస్తాం' అని చెప్పారు.
'విజయ భాస్కర్‌ సినిమాలంటే నాకు చాలా ఇష్టం. ఆయన సినిమాలో హీరోయిన్‌గా నటించడం ఆనందంగా ఉంది. శ్రీకమల్‌ నాకు మంచి స్నేహితుడు. ఓ మంచి కథతో మీ ముందుకు రాబోతున్నాం. ఈ అవకాశం ఇచ్చిన దర్శక, నిర్మాతలకు కృతజ్ఞతలు' అని నాయిక శివాని రాజశేఖర్‌ తెలిపారు. హీరో శ్రీ కమల్‌ మాట్లాడుతూ,' మీ అందరికీ వినోదం పంచడానికి ప్రయత్నిస్తాను. మీ అందరి ఆశీస్సులు కావాలి' అని అన్నారు.
రాజేంద్ర ప్రసాద్‌, మురళీ శర్మ, గెటప్‌ శ్రీను, మిర్చి కిరణ్‌, గుండు సుదర్శన్‌, బిత్తిరి సత్తి తదితరులు నటిస్తున్న ఈ చిత్రానికి
రచన, దర్శకత్వం : విజయ భాస్కర్‌. కె, నిర్మాతలు: గుంటూరు రామకృష్ణ, వెంకట శ్రీనివాస్‌ బొగ్గరం, సంగీతం : మణిశర్మ, డీవోపీ: సతీష్‌ ముత్యాల, ఆర్ట్‌ డైరెక్టర్‌: పి. సంపత్‌ రావు, ఎడిటర్‌: ఎం ఆర్‌ వర్మ, సాహిత్యం: రామ జోగయ్య శాస్త్రి, కాస్ట్యూమ్‌ డిజైనర్‌: లంక సంతోషిణి, ప్రొడక్షన్‌ కంట్రోలర్‌: పాలటి శ్రీనివాసరావు, మేకప్‌: తోట గోపి.
