'గుండెల్లోన గుండెల్లోన నిన్ను దాచేసి...' జాగ్రత్తగా చూసుకుంటాను అని తన ప్రేయసి బుజ్జమ్మకి చెబుతున్నారు హీరో విశ్వక్‌ సేన్‌. ఇంతకీ ఆ బుజ్జమ్మ ఎవరు?, ఆమెను విశ్వక్‌ సేన్‌ ఎందుకు ప్రేమించాడు? అనే విషయాలు తెలియాలంటే మాత్రం 'ఓరి దేవుడా' సినిమా చూడాల్సిందేనంటున్నారు మేకర్స్‌. విశ్వక్‌ సేన్‌, మిథిలా పాల్కర్‌, ఆశా భట్‌ హీరో, హీరోయిన్లుగా నటిస్తున్న చిత్రం 'ఓరి దేవుడా'. అశ్వత్‌ మారి ముత్తు దర్శకత్వంలో పి.వి.పి. బ్యానర్‌పై ప్రసాద్‌ వి.పొట్లూరి నిర్మించారు. అగ్రకథానాయకుడు వెంకటేష్‌ ఇందులో దేవుడు పాత్రలో కనిపించబోతున్నారు. ఈ సినిమాను దీపావళి సందర్భంగా ఈనెల 21న విడుదల చేస్తున్నారు.
తాజాగా ఈ సినిమా నుంచి 'గుండెల్లోన..' అనే బ్యూటీఫుల్‌ సాంగ్‌ను రిలీజ్‌ చేశారు. కోలీవుడ్‌ యంగ్‌ మ్యూజికల్‌ సెన్సేషనల్‌ అనిరుధ్‌ ఈ పాటను పాడటం విశేషం. ట్యూన్‌, దానికి తగ్గ లిరిక్స్‌తో పాట వినసొంపుగా ఉంది. అనిరుధ్‌ తనదైన వాయిస్‌తో ఈ పాటను పాడి, దానికి మరింత అందాన్ని తీసుకొచ్చారు. కాసర్ల శ్యామ్‌ ప్రేయసిపై ప్రియుడు ప్రేమను ఎంత గొప్పగా చెప్పొచ్చో లిరిక్స్‌ ద్వారా తెలిపారు. పాటలో విశ్వక్‌ సేన్‌, ఆశా భట్‌ మధ్య బ్యూటీఫుల్‌ కెమిస్ట్రీ కనిపిస్తుంది. ఈ వాన పాట, అందుకు తగ్గ ఫుట్‌ ట్యాపింగ్‌ మూమెంట్స్‌తో చూడటానికి కన్నుల పండుగలా అనిపిస్తుంది. విజరు ముక్తవరపు సినిమాటోగ్రఫీ అందిస్తున్న ఈ సినిమాలో రాహుల్‌ రామకృష్ణ, మురళీ శర్మ ఇతర ప్రధాన పాత్రల్లో నటిస్తున్నారు.
