అభిరామ్‌ వర్మ, సాత్వికా రాజ్‌ హీరో, హీరోయిన్లుగా డైరెక్టర్‌ బాలు శర్మ దర్శకత్వం వహించిన చిత్రం 'నీతో'. పధ్వీ క్రియేషన్స్‌, మిలియన్‌ డ్రీమ్స్‌ క్రియేషన్స్‌ బ్యానర్లపై సంయుక్తంగా నిర్మించిన ఈ సినిమాకు ఏవీఆర్‌ స్వామి, కీర్తన, స్నేహల్‌ నిర్మాతలుగా వ్యవహరిస్తున్నారు.
యూత్‌ ఆడియన్స్‌ మెచ్చే డిఫరెంట్‌ కంటెంట్‌తో ఈ సినిమాను ప్రేక్షకుల ముందుకు తీసుకొస్తున్నారు మేకర్స్‌. ఈనెల 14న ఈ చిత్రం ప్రేక్షకుల ముందుకు రానుంది. ఇందులో భాగంగా నాయిక సాత్వికా రాజ్‌ ఈ సినిమా గురించి పలు ఆసక్తికర విషయాలను మీడియాకి తెలిపింది.
'ఈ సినిమాలో పెద్దగా ప్రాబ్లెమ్స్‌ అంటూ ఏమి లేని, ఒక బిజినెస్ ఫ్యామిలీకి చెందిన అమ్మాయిగా కనిపిస్తాను. ఎంగేజ్‌మెంట్‌ అయిన అమ్మాయికి, కొన్ని అనుకోని పరిస్థితుల వలన ఎటువంటి ప్రాబ్లెమ్స్‌ వచ్చాయి?, ఆ ప్రాబ్లెమ్స్‌ను ఎలా ఫేస్‌ చేశాను అనేది ఈ సినిమాలో నా పాత్ర. ఇదొక లైట్‌ లవ్‌ స్టోరీ జోనరే అయినా రెగ్యులర్‌ లవ్‌ స్టోరీస్‌లా కాకుండా డిఫరెంట్‌గా ఉంటుంది. వెడ్డింగ్‌ ఇన్సూరెన్స్‌ అనే థీమ్‌తో ఈ సినిమా మొత్తం సాగుతుంది. వివేక్‌ సాగర్‌ మంచి మ్యూజిక్ అందించారు. ఆల్రెడీ రిలీజైన సాంగ్స్‌ కూడా చాలా బాగున్నాయి. కథకు ఏమి కావాలి అనేది తన మ్యూజిక్ ద్వారా వివేక్‌ అందించారు. అభిరామ్‌ వర్మ చాలామంచి కో-స్టార్‌. ఆయనతో వర్క్‌ చేయటం చాలా ఆనందంగా ఉంది. అలాగే ఆయన మంచి సపోర్టివ్‌ యాక్టర్‌ కూడా. కొన్ని సీన్స్‌ తీసినప్పుడు, అలాగే షాట్స్‌లో, రియాక్షన్స్‌లో డైలాగ్స్‌ విషయంలో చాలా మంచి హెల్ప్‌ చేశాడు. ఈ సినిమా కచ్చితంగా అందరికి నచ్చుతుందని ఆశిస్తున్నాను. ఇందులో నేను పోషించిన పాత్రతో తెలుగునాట నాకు మరిన్ని అవకాశాలు వస్తాయనే నమ్మకం ఉంది. కథ, పాత్ర నచ్చితే ఏ తరహా చిత్రంలోనైనా నటించేందుకు రెడీగా ఉన్నాను. అలాగే మల్టీఫుల్‌ లాంగ్వేజెస్‌లోనూ నటించటానికి సిద్ధంగా ఉన్నాను. నేను ఏ పాత్ర చేసినా ఆ పాత్రకు మంచి గుర్తింపు ఉండాలని కోరుకుంటాను. ఈ సినిమాలో నేను పోషించిన పాత్రకు మంచి గుర్తింపు కచ్చితంగా వస్తుంది' అని సాత్వికారాజ్‌ చెప్పారు.
