ప్రభాస్‌, డైరెక్టర్‌ ప్రశాంత్‌ నీల్‌ కాంబినేషన్‌లో రూపొందుతున్న భారీ బడ్జెట్‌ పాన్‌ ఇండియా చిత్రం 'సలార్‌'. హోంబలే ఫిలింస్‌ పతాకంపై విజయ్‌ కిరగందూర్‌ ఈ చిత్రాన్ని నిర్మిస్తున్నారు. మలయాళ సూపర్‌స్టార్‌ పథ్వీరాజ్‌ సుకుమారన్‌ ఇందులో ప్రతి నాయకుడిగా నటిస్తున్నారు. ఆదివారం ఆయన పుట్టినరోజు సందర్భంగా 'సలార్‌' సినిమాలో ఆయన చేస్తున్న వరదరాజ్‌ మన్నార్‌ పాత్రకు సంబంధించిన పోస్టర్‌ను విడుదల చేశారు.
'వరదరాజ్‌ మన్నార్‌ పాత్ర .. ప్రభాస్‌ పాత్రకు దీటుగా ఉంటుంది. ఈ ఇద్దరు స్టార్‌ హీరోల మధ్య గొప్ప డ్రామాను మనం ఈ చిత్రంలో చూడబోతున్నాం. అదే ఈ సినిమాలో మెయిన్‌ హైలైట్‌గా ఉండనుంది' అని చిత్ర బృందం తెలిపింది.
పథ్వీరాజ్‌ సుకుమార్‌ చేస్తున్న పాత్ర గురించి దర్శకుడు ప్రశాంత్‌ నీల్‌ మాట్లాడుతూ, 'మలయాళంలో సూపర్‌స్టార్‌ అయిన పథ్వీరాజ్‌ మా 'సలార్‌' సినిమాలో చేయటం ఎంతో ఆనందంగా ఉంది. వరదరాజ మన్నార్‌ పాత్రలో ఆయన కంటే గొప్పగా మరెవరూ సూట్‌ కారు. ఆయన ఆ పాత్రను పోషించిన తీరు అద్భుతం. తన గొప్ప నటనతో పాత్రకు న్యాయం చేశారు. ఆయన ఈ సినిమాలో నటించడం వల్ల డ్రామా నెక్ట్స్‌ రేంజ్‌లో ఆడియెన్స్‌కి కిక్కేంచేలా ఉంటుంది. మలయాళ పరిశ్రమలో సూపర్‌స్టార్‌గా ఉన్న ఆయనకు భారీ సంఖ్యలో అభిమానులు ఉన్నారు. పథ్వీరాజ్‌, ప్రభాస్‌ లాంటి ఇద్దరు గొప్ప నటులను డైరెక్ట్‌ చేయటం గ్రేట్‌ ఎక్స్‌పీరియెన్స్‌' అని అన్నారు. ఇండియన్‌ బాక్సాఫీస్‌ దగ్గర సెన్సేషన్‌ క్రియేట్‌ చేసిన 'కె.జి.యఫ్‌' తర్వాత ప్రభాస్‌తో ప్రశాంత్‌ నీల్‌, హోంబలే ఫిలింస్‌ కాంబినేషన్‌లో రూపొందుతున్న ఈ చిత్రంపై హై ఎక్స్‌పెక్టేషన్స్‌ నెలకొన్నాయి. ఫ్యాన్స్‌, ప్రేక్షకులు ఎంతో ఆసక్తిగా ఎదురు చూస్తున్నారు. శ్రుతీ హాసన్‌ హీరోయిన్‌గా నటిస్తున్న ఈ చిత్రం ఐదు భాషల్లో తెరకెక్కుతోంది.
జగపతి బాబు, ఈశ్వరీ రావు, శ్రియా రెడ్డి తదితరులు ఇతర కీలక పాత్రల్లో నటిస్తున్న ఈ చిత్రాన్ని ప్రపంచ వ్యాప్తంగా వచ్చే ఏడాది సెప్టెంబర్‌ 28న విడుదల చేస్తున్నారు.
