రాజేంద్ర ప్రసాద్‌, నరసింహ రాజు ప్రధాన పాత్రలలో ఆపిల్‌ క్రియేషన్స్‌ బ్యానర్‌ పై డా.జగన్‌ మోహన్‌ డి వై నిర్మించిన చిత్రం 'అనుకోని ప్రయాణం'. వెంకటేష్‌ పెదిరెడ్ల దర్శకత్వంలో రూపొందిన ఈ చిత్రానికి బెక్కం వేణుగోపాల్‌ సమర్పకుడు. ఈ చిత్రం ఈనెల 28న థియేటర్లో విడుదల కానుంది. ఈ నేపథ్యంలో ఈ చిత్ర ట్రైలర్‌ లాంచ్‌ ఈవెంట్‌ గ్రాండ్‌గా జరిగింది. నటుడు సోహెల్‌, దర్శకులు వీరభద్రమ్‌, ఎస్వీ కష్ణా రెడ్డి, అచ్చి రెడ్డి, విజయ భాస్కర్‌ కె, నందిని రెడ్డి ఈ వేడుకలో ముఖ్య అతిథులుగా పాల్గొన్నారు.
ఈ సందర్భంగా రాజేంద్ర ప్రసాద్‌ మాట్లాడుతూ,'నా నట జీవితంలో చేసిన చిత్రాల్లో ది బెస్ట్‌ సినిమా 'అనుకోని ప్రయాణం'. 'ఆ నలుగురు' సినిమా విడుదలైనప్పుడు కొంత టెన్షన్‌ పడ్డాను. ఆ సినిమా ట్రైలర్‌, పోస్టర్‌లో నేను సీరియస్‌గా కనిపిస్తే అందరూ కాస్త సర్‌ప్రైజ్‌ అయ్యారు. ఒక వ్యక్తి చనిపోయిన తర్వాత తన పరిస్థితి ఎలా ఉంటుందో చూపించే కథ అది. అందరూ నవ్వి, నవ్వి వంద రోజులు చూశారు. ఈ సినిమా కూడా అంత పెద్ద విజయాన్ని అందుకుంటుంది. కరోనా సమయంలో మనసుని హత్తుకునే కథలు చాలా జరిగాయి. కరోనా సమయంలో ప్రాణానికి ప్రాణమైన ఇద్దరు స్నేహితులు మధ్య జరిగే అద్భుతమైన కథ. ఒరిస్సా నుండి రాజమండ్రి వరకు జరిగే ఒక 'అనుకోని ప్రయాణం' ఇందులో అద్భుతం. ఇది బాధలు చూపించే సినిమా కాదు. గోలగోల చేసే సినిమా. ప్రేక్షకులు కూడా కచ్చితంగా సినిమాని ఎంజారు చేస్తారు. నరసింహ రాజు ఈ కథలో నటించడమే ఒక విజయం. ఆయన అనుభవం ఈ సినిమాలో ఎంతగానో ఉపయోపడింది. డా.జగన్‌ మోహన్‌ అద్భుతమైన కథ రాశారు. వెంకటేష్‌ పెదిరెడ్ల చాలా చక్కగా సినిమాని తీశారు. బెక్కం వేణుగోపాల్‌ మంచి కంటెంట్‌ని ఎంపిక చేసుకునే నిర్మాత' అని తెలిపారు.
'రాజేంద్ర ప్రసాద్‌ లేకపోతే ఈ సినిమా లేదు. వైవిధ్యమైన సినిమాలు చేయడంలో ఆయనికి ఆయనే సాటి. షూటింగ్‌ సమయంలో కూడా మాకు ఎంతగానో సపోర్ట్‌ చేశారు. డా.జగన్‌ మోహన్‌, వెంకటేష్‌ పెదిరెడ్ల, శివ దినవహి ఇలా అందరూ యంగ్‌ టీంతో కలిసి చేసిన సినిమా ఇది. ఈనెల 28న థియేటర్లలో రిలీజ్‌ అవుతోంది. ప్రేక్షకులకు తప్పకుండా నచ్చుతుంది' అని నరసింహ రాజు చెప్పారు. 'ఈ అవకాశం ఇచ్చిన నిర్మాతకు కతజ్ఞతలు. రాజేంద్రప్రసాద్‌ చాలా సపోర్ట్‌ ఇచ్చారు. 'అనుకోని ప్రయాణం' ఫీల్‌ గుడ్‌ మూవీ. మీ అందరి హార్ట్‌ని టచ్‌ చేసే సినిమా. అలాగే ఇద్దరు ప్రాణ స్నేహితుల మధ్య జరిగే అద్భుతమైన సినిమా. మంచి కంటెంట్‌తో రూపొందిన ఇలాంటి సినిమాలు చాలా అరుదుగా వస్తాయి. కంటెంట్‌ బాగుంటే ప్రేక్షకులు ఏ చిత్రాన్నైనా అమితంగా ఆదరిస్తున్నారు. అలాంటి కోవలోనే రూపొందిన మా చిత్రం కూడా ప్రేక్షకుల్ని కచ్చితంగా మెప్పిస్తుందనే నమ్మకంతో ఉన్నాం' అని దర్శకుడు వెంకటేష్‌ పెదిరెడ్ల చెప్పారు.
ఈ సినిమాలో రాజేంద్ర ప్రసాద్‌ టెన్షన్‌ పెడతారు, నవ్విస్తారు. సినిమా అంత ప్రేక్షకులు ఎంజారు చేస్తారు. మంచి ఎమోషన్‌ కూడా ఉంటుంది. కరోన సమయంలో ఈ సినిమా కథ రాసే సమయం దొరికింది. ప్రతిభగల నటీనటులు, సాంకేతిక నిపుణులు ఈ సినిమా కోసం పని చేశారు.
- నిర్మాత డా.జగన్‌ మోహన్‌
