విశ్వక్‌ సేన్‌, మిథిలా పాల్కర్‌, ఆశా భట్‌ హీరో, హీరోయిన్లుగా నటించిన చిత్రం 'ఓరి దేవుడా'. పి.వి.పి. బ్యానర్‌పై ప్రసాద్‌ వి.పొట్లూరి ఈ చిత్రాన్ని నిర్మించారు. అశ్వత్‌ మారి ముత్తు దర్శకుడు. అగ్రకథానాయకుడు వెంకటేష్‌ ఇందులో దేవుడు పాత్రలో కనిపించబోతున్నారు.
ఈ సినిమాను దీపావళి సందర్భంగా ఈనెల 21న విడుదల చేస్తున్నారు. ఈ నేపథ్యాన్ని పురస్కరించుకుని నాయికలు మిథిలా పాల్కర్‌, ఆశాభట్‌ మంగళవారం మీడియాతో మాట్లాడుతూ, 'ఈ సినిమాలో మా పాత్రలు ఎలా ఉంటాయో మాటల్లో కంటే వెండితెరపై చూస్తూనే థ్రిల్లింగ్‌గా ఉంటుంది. ప్రేక్షకులను ఎంటర్‌టైన్‌ చేసే చక్కటి రొమాంటిక్‌ కామెడీ ఎంటర్‌టైనర్‌ ఇది. విశ్వక్‌సేన్‌ అద్భుతంగా నటించాడు. మంచి కోస్టార్‌. ఆయనతో నటించటం చాలా కంఫర్టబుల్‌గా ఉంటుంది. ఇక భగవంతుడిగా వెంకటేష్‌ నటించారు. కథకి, ఆయనకి ఉన్న సంబంధం ఏంటి అనేది కూడా చాలా ఆసక్తికరం. చిన్ననాటి స్నేహితురాలే భార్యగా వస్తే ఓ యువకుడి జీవితంలో ఏం జరిగింది అనే విషయాన్ని దర్శకుడు అశ్వత్‌ అత్యద్భుతంగా వెండితెరపై ఆవిష్కరించారు. అన్ని వర్గాలను మెప్పించే సినిమా ఇది' అని చెప్పారు.
