చిరంజీవి, బాబీ (కెఎస్‌.రవీంద్ర), మైత్రీ మూవీ మేకర్స్‌ క్రేజీ కాంబినేషన్‌లో ఓ సినిమా రూపొందుతున్న విషయం తెలిసిందే. మెగా154 వర్కింగ్‌ టైటిల్‌తో ఉన్న ఈ సినిమా షూటింగ్‌ ప్రస్తుతం హైదరాబాద్‌లో జరుగుతోంది. యాక్షన్‌ సీక్వెన్స్‌ని చిత్రీకరిస్తున్నారు. రవితేజ ఈ చిత్రంలో పవర్‌ ఫుల్‌లో పోషిస్తున్నారు. ఈ చిత్ర టైటిల్‌ టీజర్‌ను దీపావళికి విడుదల చేయనున్నట్లు ఇటివలే మేకర్స్‌ ప్రకటించారు. గురువారం దీనికి సంబధించిన ముహూర్తం ఫిక్స్‌ చేస్తూ చిత్రం ఓ అప్డేట్‌ ఇచ్చింది. ఈనెల 24న ఉదయం 11:07 గంటలకు టైటిల్‌ టీజర్‌ను రిలీజ్‌ చేస్తున్నట్లు ప్రకటించారు. ఈ సందర్భంగా ఎనౌన్స్‌మెంట్‌ పోస్టర్‌ని కూడా విడుదల చేశారు.
'ఎనౌన్స్‌మెంట్‌ పోస్టర్‌లో చిరంజీవి మాస్‌ లుక్‌ అభిమానులకు పూనకాలు తెప్పించడం ఖాయంగా కనిపిస్తోంది. పోస్టర్‌ పై 'బాస్‌ వస్తున్నాడు' అని రాయడం అంచనాలని మరింత పెంచేసింది. సినిమాను 2023 సంక్రాంతికి విడుదల చేయడానికి ప్లాన్‌ చేస్తున్నారు. అన్ని కమర్షియల్‌ హంగులతో కూడిన మాస్‌ యాక్షన్‌ ఎంటర్‌టైనర్‌గా తెరకెక్కుతున్న ఈ చిత్రంలో చిరంజీవి సరసన శతి హాసన్‌ కథానాయికగా నటిస్తోంది. నవీన్‌ యెర్నేని, వై రవిశంకర్‌ ఈ చిత్రాన్ని నిర్మిస్తుండగా, జికె మోహన్‌ సహ నిర్మాతగా వ్యవహరిస్తున్నారు. మెగా 154కోసం ప్రముఖ నటీనటులు, అత్యున్నత స్థాయి సాంకేతిక నిపుణులు పని చేస్తున్నారు. ఈ చిత్రానికి బాబీ కథ, మాటలు రాయగా, కోన వెంకట్‌, కె. చక్రవర్తి రెడ్డి స్క్రీన్‌ప్లే అందిస్తున్నారు. రైటింగ్‌ డిపార్ట్‌మెంట్‌లో హరి మోహన కృష్ణ, వినీత్‌ పొట్లూరి కూడా పని చేస్తున్నారు' అని చిత్ర బృందం తెలిపింది.
