ప్రభాస్‌ పుట్టినరోజు సందర్భంగా ఆయన కొత్త సినిమా 'ఆది పురుష్‌' నుంచి ఓ స్పెషల్‌ పోస్టర్‌ను చిత్ర బృందం విడుదల చేసింది. సీతమ్మను అపహరించిన రావణుడి సంహారం జరగాల్సిందేనని ప్రతిజ్ఞ చేసిన రాఘవుడు వానర సైన్యంతో కలిసి లంకపై దండెత్తిన అపూర్వ దృశ్యాన్ని గుర్తుచేసిందీ పోస్టర్‌.ఈ పోస్టర్‌లో రాముడిగా పోతపోసినట్లు ప్రభాస్‌ కనిపించడం విశేషం. రణక్షేత్రం వైపు దృష్టి సారిస్తున్న ఆ వాడి చూపులు, లక్ష్యం వైపు వడిగా పడే ఆ అడుగులు, శత్రువును చీల్చేందుకు సిద్ధమైన విల్లంబులతో రాముడి కార్యదీక్షను ప్రభాస్‌ తన ఆహార్యంలో అత్యద్భుతంగా చూపించడం మరో విశేషం.
ప్రభాస్‌ బర్త్‌డే నేపథ్యంలో 'ఆది పురుష్‌' నుంచి విడుదల ఈ లుక్‌ అభిమానులతోపాటు అందరినీ అలరిస్తూ, సోషల్‌ మీడియాలో ట్రెండింగ్‌ అవుతోంది. ఆదిపురుష్‌ చిత్రాన్ని పౌరాణిక గాథ రామాయణం నేపథ్యంతో దర్శకుడు ఓం రౌత్‌ తెరకెక్కిస్తున్నారు. టీ సిరీస్‌, రెట్రోపైల్స్‌ ప్రొడక్షన్స్‌ సంస్థలు సంయుక్తంగా నిర్మిస్తున్నాయి. యూవీ క్రియేషన్స్‌ పతాకంపై వంశీ, ప్రమోద్‌ నిర్మాణంలో భాగమయ్యారు. కృతి సనన్‌ సీతగా, సైఫ్‌ అలీఖాన్‌ రావణాసురుడి పాత్రల్లో నటిస్తున్న ఈ సినిమాను ఐమాక్స్‌, త్రీడీ ఫార్మెట్‌లో రాబోయే సంక్రాంతి పండక కానుకగా జనవరి 12న ప్రపంచవ్యాప్తంగా భారీ స్థాయిలో విడుదల చేయబోతున్నారు.
