మలయాళంలో బ్లాక్‌ బస్టర్‌ మూవీగా నిలిచిన 'వికతి' సినిమాను తెలుగు నేటివిటీకి అనుగుణంగా రీమేక్‌ చేసి తెరకెక్కించిన యూత్‌ఫుల్‌ మెసేజ్‌ ఓరియెంటెడ్‌ సినిమా 'అందరూ బాగుండాలి అందులో నేనుండాలి'. అలీ సమర్పణలో అలీవుడ్‌ ఎంటర్టైన్మెంట్స్‌ బ్యానర్‌ పై అలీ, నరేష్‌ ప్రధాన పాత్రల్లో నటించిన చిత్రమిది. శ్రీపురం కిరణ్‌ దర్శకత్వంలో అలీబాబ, కొణతాల మోహన్‌కుమార్‌, శ్రీ చరణ్‌ ఆర్‌. సంయుక్తంగా నిర్మించారు. ఈ చిత్రం ఈనెల 28న ఆహాలో స్ట్రీమింగ్‌ అవుతున్న సందర్భంగా చిత్ర యూనిట్‌ ప్రసాద్‌ ల్యాబ్‌లో చిత్ర ట్రైలర్‌, టీజర్‌ను ఘనంగా లాంచ్‌ చేశారు.
ఈ కార్యక్రమానికి ముఖ్య అతిథులుగా వచ్చిన దర్శక, నిర్మాతలు ఎస్వీ కష్ణారెడ్డి, అచ్చిరెడ్డి, బ్రాహ్మానందం చేతుల మీదుగా ఈ చిత్ర ట్రైలర్‌, టీజర్‌ను విడుదల చేశారు.
దర్శక, నిర్మాత ఎస్వీ కష్ణారెడ్డి మాట్లాడుతూ, 'ఈ టైటిల్‌ వినడానికి చాలా ఆనందంగా ఉంది. ఎక్కడో మలయాళంలో చూసిన 'వికతి' సినిమా నచ్చి, తెలుగు ప్రేక్షకులకు అందించాలనే తపనతో అలీ నిర్మాతగా మారి సీనియర్‌ నటులందరితో తీసిన ఈ సినిమా ద్వారా కొత్త దర్శకుడిని, మ్యూజిక్ డైరెక్టర్‌ని పరిచయం చేయడం గొప్ప విషయం. నటుడుగా వేయి చిత్రాలకు పైగా నటించిన అలీ ఈ చిత్రం ద్వారా సొంత బ్యానర్‌ పెట్టి సినిమా నిర్మించే స్థాయికి ఎదగటం చాలా సంతోషంగా ఉంది' అని అన్నారు.
'ప్రేక్షకుల మనసుకు హత్తుకునే మంచి కథను సెలెక్ట్‌ చేసుకుని తన బ్యానర్‌లో అలీ తెరకెక్కించిన ఈ సినిమాలో మంచి మెసేజ్‌ ఉంది. ప్రతి ఒక్కరూ చూడవలసిన చిత్రమిది' అని నిర్మాత అచ్చిరెడ్డి చెప్పారు.
బ్రహ్మానందం మాట్లాడుతూ, 'నేను, అలీ ఒకే టైమ్‌లో కెరీర్‌ స్టార్ట్‌ చేశౄం. ఎస్వీ కష్ణారెడ్డి, అచ్చిరెడ్డి 'యమలీల' సినిమా ద్వారా అలీని హీరోగా పరిచయం చేశారు. అప్పట్లో అది ఒక ల్యాండ్‌ మార్క్‌గా నిలిచింది. ఆలా ఎదుగుతూ వచ్చిన అలీ మంచి సబ్జెక్టును సెలెక్ట్‌ చేసుకొని, చాలా మంది సీనియర్‌ నటులతో తీసిన ఈ సినిమా గొప్ప విజయం సాధించాలి' అని తెలిపారు. 'మలయాళంలో జరిగిన వాస్తవ సంఘటనల ఆధారంగా తెరకెక్కిన చిత్రమిది. నరేష్‌, నేను పోటాపోటీగా నటించాం. డైరెక్టర్‌ కిరణ్‌ ఈ సినిమాను అద్భుతంగా తెరకెక్కించారు. ఈ సినిమా చూసిన ప్రతి ఒక్కరికీ కచ్చితంగా నచ్చుతుంది' అని నటుడు, నిర్మాత అలీ అన్నారు. చిత్ర నిర్మాత కొణతాల మోహనన్‌ కుమార్‌ మాట్లాడుతూ,'ఈ కథకు ఈ టైటిల్‌ కరెక్ట్‌ యాప్ట్‌ అని పెట్టాం. ఇలాంటి సినిమా చేసే అవకాశం కల్పించిన అలీకి ధన్యవాదాలు. 'ఆహా'లో స్ట్రీమింగ్‌ అవుతున్న ఈ సినిమా అందరితో 'ఆహా' అనిపించుకుంటుంది' అని తెలిపారు.
'1200 సినిమాలు చేసిన అలీ మొదటి సారి నిర్మాతగా మారి, చేస్తున్న ఈ సినిమాకు నేను దర్శకుడిని అయినందుకు చాలా హ్యాపీగా ఉంది. అందరి సహకారంతో సినిమా చాలా బాగా వచ్చింది' అని దర్శకుడు శ్రీపురం కిరణ్‌ అన్నారు.
